去到外國生活，每逢遇上農曆新年，成件事個experience同喺香港自然有好多差異。
首先係氣氛上既差異。以前一出街，基本上就已經好有新年氣氛。淨係樓下果一大班喺新年先出現同你拜年既看更已經夠氣氛啦。但喺加拿大，如果你好似我咁係住house，行過隔離鄰舍唔會有人同你恭喜發財，更加唔會有咩特別既農曆新年裝飾。
我有幻想過如果有人好似聖誕節或者萬聖節咁喺門口擺個吹氣財神、吹氣醒獅同吹氣招財貓，咁就應哂節了。
其次係形式上既差異。移民後既新年，變得比以前「數碼化」咗好多。因為無論係拜年定係俾利是，宜家基本上全部都係online進行。
十年前如果同人講網上拜年同俾利是，可能大部分會以為你係講笑。但我相信因為COVID同移民潮，令「視像拜年」同「電子利是」呢啲聽落好似有啲離奇既發明，慢慢變成我地一眾離散港人既常態。
其實我相信由我祖父母到我父母一代、再由我父母到我呢一代，可能好多過年習俗已經流失咗。我唔敢想像到我既下一代、什至到我啲孫果一代既時候，佢地喺加拿大呢個地方會點慶祝新年。到底到時仲有啲咩習俗仲可以留低？會唔會到時過年係食pizza慶祝?
我同老婆都唔係啲儀式感重既人。連結婚紀念日都幾乎要人提既我地，其實就算係呢度本地既大節日，例如萬聖節，都無點樣特別慶祝。不過，我倒係好希望兩姐弟可以認識同明白農曆新年呢個無假放既節日，對我地華人黎講有幾重要。
因為農曆新年，係代表「一家團聚」既節日。
所以無論我地幾懶，親手派利是呢個動作我地都會堅持。
老婆：「好啦。每人講十句賀年說話我先俾利是佢。」
弟 （努力）：「恭喜發財、身體健康、萬事如意、出入平安、龍馬精神、大吉大利……」
雖然弟弟諗咗好耐先講到，但我都已經好impressed。畢竟一兩年前，弟弟都仲係講緊「身體發財」呢啲不倫不類既賀年說話。
我另轉頭同家姐講：「到你喇。」
姐（機械式）：「恭喜發財、恭喜發財、恭喜發財……」
我用難以置信既眼神望住家姐，佢反而理直氣壯地同我講：「十句丫嘛，你無話唔可以重複㗎。」
我諗係時候教下家姐咩叫做「同你開年」了。