黎咗加拿大幾年,兩姐弟既班主任 (呢度叫home room teacher)都咁啱係女性。今年阿囡升中,終於遇到第一位阿sir做班主任。
阿囡既班主任係一位大約三十歲左右既白人男性。佢啲頭髮自然捲曲、啡到近乎紅色,仲有同樣鮮色既大鬍鬚。佢有啲似電影《Hangover》入面飾演Alan既Zach Galifianakis,只係佢比較瘦同年輕。
我就叫佢做Alan吧。
第一次見Alan係喺阿囡升中開學既開放日。我地參觀班房,發現班房一個角落放咗一副未砌完既puzzle,隔離仲有一部健身單車。
「哦,有時啲小朋友集中唔到,俾佢出黎砌下puzzle或者郁下等佢集中返,好過佢喺度攪攪震。」
我地喺班房徘徊,問阿囡佢坐喺邊度。阿囡指俾我地睇,Alan滿意地同我地講:「佢(阿囡)都算係一個小領袖。我特登搵啲曳仔坐佢附近等佢幫手治下佢地。佢so far都治得幾好。」
Alan主要負責教一科叫做humanity (人文學)既科目。人文學係一個都幾跨學科既科目,當中可以包括歷史、哲學、地理、政治、經濟、藝術、宗教等等。聽阿囡既形容,我覺得佢讀緊既人文科有少少似歷史科加英文科再加少少社會科。
今年人文科其中一個topic係學加拿大同歐洲殖民既歷史,基本上有一大部份就係我考加拿大入籍試既內容。如果你好似我咁有考加拿大入籍試,你應該會知道係幾咁悶、幾咁唔exciting。
Alan將呢個都可以幾悶既題目變成一個模擬遊戲。佢將學生分組,每組學生都要扮演好似當年英國或法國既殖民者。佢地要管理自己既殖民地,當中包括設計殖民地既旗號、同其他殖民地建立邦交同進行商業活動、管理殖民地內既資源、制作地圖……總之要想辦法令自己既殖民地喺新世界下生存,甚至係擴展到更大版圖。佢地要策劃向其他國家發動戰爭或者防禦他國攻擊,每組都要提交攻擊同防守計劃。綜合每組提交既計劃,Alan會交俾ChatGPT去模擬作戰既結果。
年輕老師既好處,就係會攪攪新意思。比起就咁講解一段歷史,俾學生參與其中,有趣得多之餘亦更鼓勵學生思考。畢竟人文科唔係考你記性,而係好似通識科一樣鍛鍊小朋友既批判思考。從阿囡放學眉飛色舞地解釋佢同啲同學制定咗啲咩策略去攻打其他國家,就知道佢有幾投入、幾喜歡Alan教呢一科。
Alan對住呢班正踏入青春期、開始建立自我、意見多多情緒又難捉摸既學生,基本上放棄咗傳統老師既威嚴。佢同學生間既對答無乜修飾,例如佢叫啲學生出去排隊果時唔好嘈,佢會同學生講:「陣間出去唔好嘈喇。你地曳係我會俾人話㗎,你地乖乖地等我有face啲嘛。」
有一次阿囡成班出去downtown field trip,Alan喺臨出發前語長心長地同學生講:「今次大家出去小心啲。唔好自己走咗去,更加唔好亂咁跑受傷呀。因為你唔見咗或者有乜整親…我要寫report㗎……」
Alan同學生呢種sarcasm (挖苦) 既交流方式,細啲既小朋友未必明白、大啲既學生又可能覺得你幼稚。但咁啱對住阿囡呢班唔大唔細既學生,又似乎奏效。至少比起上年比較傳統既女班主任,阿囡似乎比較受落呢個有啲頑皮既男班主任。當然,家長們接唔接受就另一回事吧…
「唉,你班人真係好鬼煩。我屋企已經有兩隻麻煩友 (Alan有兩個小朋友),返黎學校你地又要俾麻煩我。唔該你地合作啲啦….」每次啲學生唔聽話,Alan唔知係講笑定講真地對住班學生自白。
我諗Alan呢番說話,多少都係每個家長既心聲。教小朋友真係好麻煩。如果我地一話佢佢就識聽即刻識改你話幾好。不過現實係:小朋友不是機器。將教晦放入佢地雙耳好容易,但要放入佢地個心真係好難。
Alan提醒咗我:想要將說話放入小朋友既心入面,有時候都要因時制宜,調整一下同佢地既溝通方式。就算係同一個道理,對住唔同年紀唔同性格既小朋友,某啲講法可能會更有效果。
雖然係麻煩,不過畢竟呢個麻煩,都係我地親自製造既……