[姐弟海外升學記] (七) 決定了!兩姐弟的學校

加拿大既幼稚園其實只係讀一年,可讀可唔讀。而且讀完幼稚園就直接喺同一間學校升小學,真正一條龍,唔駛好似喺香港咁又要面試又要大抽奬又要叩門,攪到家長命都短幾年。

不過正因為咁,幫家姐報charter school既時候都心知機會渺茫,因為好少人會由幼稚園升上去讀讀下中途退學,尤其係呢類比較熱門既學校。經過兩個月既等待,終於收到學校通知:家姐排喺waiting list,要等有學生退學先有位入去讀。雖然有少少失望,不過其實上次去完學校參觀,我同老婆都幾鐘意我地區果間designated school,所以索性叠埋心水送家姐入去讀。

咁…..弟弟又如何?

如果用返一貫幫弟弟買野時用既「同家姐一樣咪得囉」定律,基本上送佢入去designated school度讀就攪掂了,方便我地admin之餘仲有家姐?住佢。不過我同老婆又覺得佢兩隻野南轅北轍,俾佢地喺唔同環境度學習,尤其是對弟弟應該會有幫助。

而且弟弟喺加拿大既入學機會其實比家姐多。弟弟今年5歲,黎到加拿大啱啱好就係入讀幼稚園既年紀,同其他本地小朋友一樣由零開始報名,無家姐咁劣勢。所以今次我地終於無偷懶,幫弟弟報咗4間學校,有紀錄以來首次多過家姐。

第一間幫弟弟(同埋家姐)報名既學校喺一間多人報名到要排足幾年既charter school,所以當年我地都未有意欲移民老婆就已經一早報咗,諗住:「話唔埋有一日會去加拿大讀書呢」。

第二間報名既學校就係老婆既朋友介紹,後來家姐考唔到果間charter school。不過呢間學校有IQ test既要求但弟弟唔符合,結果入閘都入唔到。

最後兩間報名既學校都係public school,不過唔係行一般public school既課程,而係行所謂既alternative program(可能只係Alberta先有,唔知其他省有無)。Alternative program旨在提供有別於regular program既教育 – 唔同語言、宗教又或者係教學理念,例如:

  • 蒙特梭利 (Montessori)
    我估大家都有可能聽到呢個名,蒙特梭利係一個意大利既教育學家,佢既一套教育理念圍繞小朋友自製,自由和自發行動既天性 (有啲似真道既三自);學習係靠小朋友從教具中「發現」,而唔係由老師直接傳授概念。
  • TLC (Traditional Learning Centres)
    TLC可以話係蒙特梭利完全相反 – 蒙特梭利由學生主導,TLC既學習就主要由老師直接傳授知識。學校對功課同成績有要求,而且同呢度一般既學校唔同:要著校服。聽落係咪同我地喺香港返學好相似呢?

我地帶家姐去加拿大面試果陣係alternative program接受報名既時間,我地抱住「收你先算啦」既心態,幫弟弟交咗申請表去一間Montessori同一間TLC。Alternative program唔係間間public school都會開,學位比較少,學校要抽簽決定收唔收弟弟,我地唯有返香港等結果。

我地離開加拿大既第2日,老婆n年前報果間charter school竟然打去老婆屋企人度話終於輪到我地,要約弟弟做interview。老婆email去學校解釋我地咁啱已離開加拿大,再加上Covid19我地好難即刻飛返黎,有無其他選擇。不過呢間學校大把人爭住入,所以無法再等我地,我地唯有放棄kindergarten既排位重新再排小一,不過咁樣再排幾乎係等於無行了。或者我地同呢度既charter school都係無乜緣份。

不過喺我地仲消化緊家姐同弟弟考學校既結果果時,兩間alternative programs既學校email通知我地入學申請既結果了 – Montessori同TLC竟然兩間學校都抽中咗弟弟!

所以話運氣既野真係好難講。

弟弟俾咗一個happy problem俾我地:應該讀家姐間designated school,Montessori定TLC好呢?

三間學校之中,我地首先放棄TLC。我同老婆既共識係:如果同香港一樣咁返學,咁做乜要咁遠走黎呢度讀書呢?

Designated school同Montessori之間,我地最後揀咗Montessori,因為間學校嘅Montessori program 比較著重數學,正正就係弟弟既最愛。加上要小朋友有自發性地學習,唔會乜都係人地講哂俾你聽既環境下去「學會學習」,尤其是弟弟基本上你就咁同佢講佢都未必聽得入耳。

其實喺香港果時我地都想俾佢地試下讀Montessori。當年家姐未出世連名都未改,我都有幫佢排北角果間救世軍幼稚園,不過排唔到 (我仲記得係報名表度老作咗個名俾阿囡)。如果喺香港私校讀Montessori,學費又閒閒地都7、8千蚊,所以今次即管俾弟弟試一試吧。萬一佢真係唔啱讀,最多下年小一幫佢轉返去家姐間學校度讀囉。

就係咁,兩個小朋友既學校終於決定了!

不過估唔到開學又好快遇到新既選擇題:到底你俾唔俾佢地返學 (physically)?

(待續)

2 Comments

  1. hello!! 請問你地幫小朋友報學校係直接去CBE centre 定係CBE website 開一個account 報啊?謝謝

    • 你好!我地兩者都無。我地係直接去咗學校交表。我兩個小朋友都係citizen,所以唔駛去CBE度攪。唔知道你個case有無唔同?

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!