[姐弟海外升學記] (二十三) 加拿大學車

我一直都覺得「識揸車」係做人老豆既條件之一。雖則個心係咁諗,但我喺香港咁多年都無走去學車。一來覺得香港實在無乜必要揸車,養車又唔平,但更大原因係我覺得揸車好難學。

我係一個不能multi-task既人,所以揸車可以話係我既死穴,因為揸車基本上就係multi-task既極致嘛 – 睇路睇車睇人睇交通燈同時控制快慢方向訊號燈等等等等(一路打呢段字都一路緊張起黎)。但黎到加拿大,揸車基本上係生活一部分,所以終究無得逃避。


喺Alberta呢度攞車牌有幾個步驟:

  • 首先要考一個叫做driver’s knowledge test既筆試,考30條MC,啱25條就合格。合咗格就拎到一個叫做Class 7 license (learner license)既牌,可以開始學揸車。拎住7號牌唔可以自己揸車,一定要有正式車牌既人同你一齊,亦唔可以車其他人。
  • 拎住7號牌一年後可以去考一個叫Class 5 Basic既路試;合咗格就拎到一個叫做Class 5 GDL (Graduate Driver License)既license,可以自己揸車。
  • 揸住Class 5 GDL兩年就可以再去考Class 5 Advance既路試。考埋你就拎到真正full license。

上年九月我黎到加拿大第一件事就係去咗考筆試,好好彩一take過pass咗。不過筆試合格後開始凍又落雪,所以等咗成個冬天,到3、4月先開始每個weekend出去學車。起初諗住搵老婆教我,不過連一向玩開機動遊戲既佢教咗一兩次都話好驚,最終要由我外父出馬。

跟外父學咗一輪,屋企人話其實如果想保險平啲,最好正式跟個教車師傅學。好彩之前喺FB page度有位媽媽share咗一個講廣東話既師傅contact俾我,於是打去問師傅個課程內容同幾時得閒可以教車。

師傅既教車package如下:

  • 10個鐘路面學揸車 (分5次每次2個鐘;最後2個鐘喺你考試前上)
  • 2日「電視班」學駕駛知識;學完有張証明俾你買保險平啲
  • 借佢架車俾你考一次路試

成個package 650蚊加紙(已連稅),好坦白講我無乜做過比較,見網上既course好似差唔多,又貪佢講中文,於是就即刻book咗一個月後跟佢學車。

不過有一件事令我有啲不安:10個鐘就得㗎喇?我10個鐘都未揸得掂Mario Cart喎…….


正式第一日學車。師傅每次都會揸架車去到我屋企接送,都幾方便。師傅同我心目中既形象幾相近 – 高大瘦削,年紀不少,一身造型令我諗起香港既的士司機,感覺相當斯文,大概係唔講粗口既司機大佬果種感覺。

師傅:「哥哥仔,啱啱黎Calgary呀?」

我:「都黎咗一年既。」

心諗已經有十年無人叫我做哥哥仔了。

師傅:「啱啱放學呀?」

我:「唔係呀…我出咗黎做野㗎喇。啱啱放工。」

師傅:「哦……以為你仲讀緊書添!咁咪叻仔囉,搵到野做。」

忽然覺得自己細咗好多。

傾完閒計,攪咗少少手續,師傅開始介紹架車,同我地屋企架車唔係好一樣:例如我慣咗handbrake係支棍,但原來宜家啲車只喺一個掣,忽然發現自己成個大鄉里咁。

第一日我仲諗住只係喺屋企附近啲街度揸下,點知師傅已經叫我揸出去考試場地附近 (近downtown),令我再一次確信教車師傅係地球上除咗消防員之外最需要勇氣既職業。

去到考試登記處,師傅開始解釋成個考試流程:

  • 考對車內設備既認識:叫你打下左右燈、開車頭燈、死火燈、水撥等等
  • 考兩種泊車:上/落斜路泊車 (uphill / downhill parking) 同埋平行泊車 (parallel parking)
  • 出去路面兜一個圈睇下你既路面應對能力

講完,師傅就帶我去其中一條考試路段度開始學揸車同泊位。


跟師傅學咗咁多個鐘車,覺得呢位師傅既教法都幾Hong Kong Style:基本上考試為本,我做每一樣野佢都好似有份marking scheme咁話俾我知點為之ok同唔ok、邊度錯會扣幾多分、啲考官會prefer我點做等等等等。

喺學車之前,我成日覺得學泊位係最難,因為我覺得好難掌握車同路既空間距離。但跟師傅正式學車之後,發現最難既其實係喺路面上行駛。因為泊車基本上得你自己,唔理你攪幾耐總之你泊到入去就ok,再者宜家啲車有後車camera,有哂aid幫你泊;相反出到路面要留意既野太多,令我呢個不能multi-task既人覺得好困難。

另外,我無諗過原來要保持一個車速係咁難既 – 因為路段上有車速限制,大路通常都係揸50km/h;師傅話48 – 50左右考官都收貨,不過我成日一係過50, 一係就得40頭;顧得車速黎有時路面又留意得唔好,一時反應太慢,一時又睇唔到有人等緊想過馬路,令我又緊張又氣餒。


好快就跟師傅學咗8個鐘,基本上每一堂都係不斷重覆咁行有機會考果兩條考試路段同埋反覆練泊車,好似細個中五考會考操past paper既感覺。不過儘管已經練咗好多次,自己心入面依然忐忑,因為覺得自己進步咗唔係好多。

我:「下堂考試啦,師傅我駛唔駛補多幾堂先考?」

師傅:「哥哥仔,你喺有時啲反應唔夠快,不過你手車都唔算差。唔駛咁擔心,無問題既。」

腦海裏閃過師傅成個木村拓哉咁同我講:’Dont worry, be safely’既畫面。

唔覺唔覺,終於到咗考車既日子……

(待續)

Image credit: Flickr

One comment

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!