[姐弟海外升學記] (二十四) 加拿大考車(上)

練咗10個鐘車,終於到咗考車既日子。

師傅差不多兩個月前已經叫我book星期四上午考試,因為星期四兩個考官都係華人,其中一個識講廣東話亦相對無咁嚴,加埋朝早考既時間無乜車,應該會容易啲合格。

我考試前半個鐘去到考場報到,望下條街,真係無乜車喎。而當registry counter職員話俾我知今日係講廣東話果位考官考我果時,我爭啲想大叫:呢次仲唔掂?


考官終於返到黎,一聽到佢講廣東話多少有啲醒神,但並無令緊張既我放鬆。

考官首先考下我熟唔熟悉架車既設備:打下燈、響下按咁。比想像中快,考官話可以立即出發了。喺Calgary呢度考路試,考官會叫你出去考場附近既路面上行駛,佢一路會俾指示你左轉或右轉,若然無指示就一直直行。

出發了。原本稍稍回復正常既心跳,去到一個街口果陣又再度加快 – 因為平時練車師傅會喺呢個街口轉,但考官無叫我轉。

我感覺到明明之前偷睇咗老師份卷,但考果陣佢唔出既果種失望同意外。

我同考官入到一條我無行過既小路,考官呢個時候話:「好,宜家做一個上斜波泊車」。

我打起右燈,慢慢地開始泊埋去路邊。朝早練車果時,師傅話我泊車唔夠埋個路邊,所以我好刻意要俾平時更加貼近。

中國人有句野叫「物極必反」,真係至理名言。我結果係貼住個路邊咁泊咗架車埋去。

考官用好似教小朋友咁既聲氣同我講:「你其實太貼啦。你應該出返少少先去泊,小心啲。」


開咗一個唔係幾好既開局,我更加精神崩緊。唔知道係咪考官都感受到果種緊張既氣氛,佢開始同我傾閒計,問我有幾多個小朋友之類。

講下講下又入咗一條小路,考官叫我喺度做一個平行泊車。我跟住師傅教既步驟、睇住車後camera去做,幾下就泊咗架車埋去。我覺得果下除我之外,好似連考官都如釋重負。

出返大路,沿路都一直相安無事,覺得好似啲交通燈都好合作,令我暢通無阻。不過可能太順了,落緊一個斜路既時候,我望下個dashboard先驚覺:原來我行緊59km/h(車速限50km/h)。慢慢放返慢架車,考官再一次用佢果把好comforting既聲講:「你超咗速,好彩你放返慢;如果你過咗60km/h,我要即場肥你。」

好後悔自己既不小心,咁又俾佢扣咗十分,因為事實上我喺呢段路唔係第一次超速。


考官指示我轉返入一條我認得既細街。其實除咗第一個轉既路口有唔同,其餘一路考既路都係師傅同我練過好多次既路。基本上過埋呢條細街轉右,入返大路就返到registry了。

我心裏吸一口氣,心諗終於要完,啱啱右手邊有架泊咗既車,越過佢就打燈轉右吧。點知我經過呢架車既時候,考官一手捉住我個軚盤,我即刻停咗。

「太貼啦。」考官面色有少少難睇。呢個係一個受驚既表情。

「如果我唔停你,你有可能會撞到果架車個左邊倒後鏡。其實你頭先parallel parking都好貼,不過我見你無撞野所以無停你。不過今次真係唔得。」

我諗我肥佬了。


返到registry,考官好有耐心咁講我頭先出現既問題。要喺Alberta Class 5 Basic路試合格,基本上喺扣少過75分就合格。我總共俾佢扣咗65分,其實都勉強合格,不過因為最後一下出路口太貼要考官出手干預,所以即場肥佬。

師傅知道結果有啲意外:「呢個考官好少肥人㗎。不過哥哥仔,你手車唔差呀,我都無expect你會肥。係咪太緊張呀?不過唔緊要既,再考啦!你無問題㗎。」

我覺得緊張只係其一原因,但我真正既問題 – 其實我對架車既空間感由始至終都唔好,所以先會一係太左一係太右。

雖則都有預算過自己會唔合格,但知道結果既一刻依然好失落。因為覺得今次天時、地利、人和:又好天、又少車、又遇著易pass既考官,如果今次都pass唔到,我以後仲pass唔pass到?如果再一次又唔pass,好快就冬天落雪了,咁到時考咪仲難啲?越諗越多越失望。

不過諗下自己都做咗人老豆了,如果一次考試失敗就咁咀喪,第時點教佢兩個面對失敗呢?或者有時做人家長就係咁樣:雖則個心底有啲唔舒服,不過仔女面前都要死頂一下吧。

返到屋企,阿囡果然即刻問我考成點。

我 (扮豁達):「今次我fail咗啦,因為我未準備得夠好。練習得夠真係好重要!不過唔緊要,爸爸再練習下再去考過」。

阿囡攬住我,諗住佢會講幾句安慰說話,點知佢話:「咁你考到果時你都最好再練習下先載我地啦」。

好一個現實既小朋友……

(待續)

2 Comments

    • 你好!等我email你! 或者你唔介意去我fanpage留private message我喺果度覆都得

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!