[姐弟海外升學記] (四十) 從Uniqlo到Costco

Uniqlo將會喺Calgary開第一間分店,令我興奮不已。

因為我真係好鐘意Uniqlo。

第一次接觸到呢個品牌,係阿媽N年前去日本旅行買咗一件Uniqlo polo shirt俾我既時候。我記得件衫只係一件淨色、連logo都無既polo shirt,但我偏偏就係鐘意佢夠簡單無乜款。

於是當香港第一間Uniqlo喺尖沙咀美麗華商場開張之後,我就即刻走去睇下。一去,就成為咗常客。

Uniqlo之所以令當時既我著迷,係因為我覺得行Uniqlo既時候,有去咗超級巿場買野既感覺。

琳瑯滿目既貨物:無論係底衫褲、出街Tee或Hoodies、牛仔褲甚至返工恤衫西褲,Uniqlo有如超級巿場一樣應有盡有。我唔需要走去街巿 + Royal Sporting House + Giordano分開幾次買我想買既衫褲鞋襪。

但更重要既係我行Uniqlo既時候感覺好舒服,無咗購物既壓力。

我細個其實好怕去買衫,因為我好怕去到啲boutique個sales姐姐成日彈出彈入咁走埋黎同我講:「呢件新返既Tee,好似幾啱你喎」。去到Uniqlo,我鐘意就拎起件衫睇下、唔要就放底,唔會有人俾你意見亦唔會有人sell你,正正好似你喺超級巿場既時候,係唔會有個sales走出黎同你講:「呢罐梅林牌午餐肉新返既,好似幾啱你喎 」。

所以你要明白當我第一次去到Costco (美國第一大貨倉式超巿) 既時候係幾咁震撼:喂佢真係名正言順喺超級巿場賣衫喎!

早排睇咗《住加男人》一條短片,標題為「Costco買衫等於放棄人生」。主持Sam話喺Nexflix睇咗一個棟篤笑,個speaker講笑地話當你接受到去Costco (i.e. 超巿) 買衫扮靚既時候,你已經放棄咗你既人生。雖然我覺得佢講放棄人生只係講笑,但在我而言,可能早喺我未黎加拿大之前,就算我未放棄我既人生,我都早已放棄咗成為一個識得打扮既男生。

不過我倒覺得無可厚非。

畢竟我買衫扮靚,講到尾都只係想impress我想impress既人吧?咁有咩實際得過當我同我最想impress果個人 – 我老婆,一齊行入Costco既時候,佢用sales姐姐既語氣同我講:

「嘩!你睇下呢度啲褲,好似幾啱你喎!」

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!