有無諗過你既小朋友或者再下一代會完全唔識廣東話，甚至從未踏足香港？
因為一個小交通意外，我同老婆要約見物理治療師。物理治療師係一個年輕既女仔，亞洲人面孔，一頭烏黑及肩既直髮。面上既妝好白，令佢紋咗果條啡中帶紅既眉更鮮明。就算無著住件醫生袍，亦無減佢俾我專業既印象。
我叫佢做Sarah。
Sarah每日工作時間係6:30am至1:30pm，所以今朝我地一早7:00就黎到診所。如果要我日日都咁早返工，我諗我除咗物理治療，可能要追加少少心理輔導。
「其實我幾鐘意咁早返工呀。因為太早條街無乜車，所以無論塞車定落雪統統對我無乜影響。」Sarah對早起似乎不以為意。
佢問我地咁早黎，小朋友起咗身未。老婆話邊有咁早，一放假就鏟佢地都唔起身。
「哈哈我明白㗎！我細個都成日瞓到十一、二點先起身。我媽媽因為五點幾就醒，所以日日都話我浪費咗大半日。」
細個懶瞓，但大個搵咗份需要咁早起身既工。至少Sarah証實咗：三歲未必定八十。
老婆留意到Sarah個姓，發現Sarah應該係日本人。
一問之下，原來Sarah既祖父母一輩已經移咗民黎加拿大，Sarah係土生土長既日裔加拿大人。
作為香港人，疫情前我地大部分人可能閒閒地每年都至少返一次日本呢個「鄉下」。但Sarah作為日本人，反而從來無去過真係佢鄉下既日本。
而因為Sarah既父母都唔識講日文，所以Sarah一句日文都唔識。在場識得最多日文既，反而係喺日本做過野既老婆。
「我其實成日都好想去日本，認識下自己既家鄉，不過始終無機會。近年下定決心去又遇上Covid。希望下年無咁多旅遊限制可以去到。」
唔知我地呢班離散港人既下一代，會唔會有一日忽然好似Sarah咁想返香港「尋根」？而到時既香港，仲會唔會同佢曾曾曾祖父我所講俾佢地知既香港一樣呢？
Sarah帶住輕鬆既語氣話我知檢查既結果：「你其實無乜大礙，唔駛太密返黎。我俾啲exercise你喺屋企做就好了。兩星期後返黎睇下你既進度」。
知道唔駛日日7:00過黎呢度，比起知道自己身體無恙更令我如釋重負。
因為汽車保險既coverage，Sarah免費俾咗一條運動用既彈力帶俾我返去exercise，仲有一支按摩棍俾我返屋企按摩大脾既肌肉。我留意到老婆雙眼發光。
老婆：「佢有無教你點用果支按摩棍？」
我：「有呀。」
老婆：「咁你可以返去幫我按摩喎。」
我：「佢….教咗我按摩自己，無教我幫人按摩喎。」
兩個人陷入沉默。
(待續)
