[移民路上的人] (四) 閃電移民的教車師傅

如果你去緊旅行果陣有人同你講:「呢度咁正,不如索性攪埋移民留喺度啦」,你會有乜野反應?

好多香港人諗移唔移民都諗咗兩年了。但原來呢個世界上係有人聽完以上呢個問題後,會即刻動手攪移民。

上年學車,喺版友介紹下認識咗A師傅。A師傅係香港人,身材高瘦,雙腿有如兩條長竹,每次見佢都係一身teeshirt牛仔褲波鞋,好似啱啱去釣完魚返黎咁。

我以前成日幻想啲教車師傅都係好粗魯:「X!叫Y咗你踩油唔好咁Z大力啦!」但A師傅卻完全同粗魯沾不上邊,斯文又有耐性。我聽過佢最粗魯果句只係:「果個司機係咪傻佬黎㗎?」

A師傅90年代前已經移民咗黎加拿大。雖然離開香港多年,但佢香港人既基因,喺佢「考試為本」既教車理念度多少反映到出黎。

跟佢學10個鐘車 (5堂每堂2個鐘),A師傅會叫你好似我地細個考會考”操pass paper”咁不斷重覆考試既步驟同路段。師傅仲會同你分析考官既喜好同準則,成個補習天王咁。

「你地俾得錢請我,你地個目標就係pass。以前有人投訴我淨係教佢個仔考試,我同佢講我可以用30個鐘慢慢教佢個仔點揸車,佢最後咪又係book我10個鐘去考試……」

90年代前就移民,仲早過上一代97移民潮。A師傅講起移民既理由,竟然十分簡單:

「當年後生過黎呢邊探個friend;佢唔得閒陪我,話你得閒不如去攪移民啦。咁我咪走去攪囉。」

下?就係咁?

「以前好簡單,填張form走去見個官傾幾句就攪掂。咁咪索性留喺度囉!」

移民咁大件事,到底應該諗到清清楚楚算無遺策?定還是好似A師傅咁立即行動再見步行步? 

曾經有一個教攝影既老師做過一個實驗。佢將一班學生分成兩組;一組人既功課以量去計算,唔理你影得幾差,總之越交得多越高分。另一組則相反,全年只交一張相,但越靚越高分。

結果最靚既相,全部來自計影得最多相果一班。

呢個實驗既結果係想講:行動比起空想,有時結果會強得多。因為有行動先會有結果,有結果先可以思考點改進。反之,空想一個萬無一失進可攻又要退可守既計劃但無付儲實行,最終都只係原地踏步。

「你啲反應要快啲先得㗎。喺個十字路口見到個情形就要立刻決定點走。隔離都紅燈喇,你仲等乜野?」

每一次A師傅話我果陣,我都覺得佢既說話有種弦外之音,特別係佢果句:「你仲等乜野」。

可能因為我曾經都同好多今日既香港人一樣,躊躇在「移唔移民」呢個十字路口上。

(待續)

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!