香港曾經有一個叫做MC Jin既饒舌歌手 (rapper)。佢第一隻廣東話大碟入面有一隻歌，叫做「識講唔識睇」，內容係自嘲喺美國長大既自己識聽、識講，但係唔識睇中文。
我對呢隻歌有好深印象，因為我第一次聽到呢隻歌既時候，咁啱身邊就有一位「識講唔識睇」既人。
佢就係我第一份工既上司 。我喺度叫佢做Dennis。
Dennis係俗稱CBC (Canadian-Born Chinese)既加拿大華人。佢外表嚴肅，戴住一副黑框眼鏡；低沉既聲線再加上粗壯既身型，公司同事一致認為佢應該去選港男。
同佢熟絡之後，發現呢個大隻仔不單貪玩，而且更有可愛一面：喺佢張枱上面，放咗一隻Bunny公仔。
雖然Dennis係喺加拿大長大，但佢俾我既感覺非常local。佢既英文固然流利，但廣東話亦一樣純正。佢可以一方面喺度執我啲英文串字同發音，轉個頭走去教啲外國同事講廣東話粗口。
公司所有佢有份setup既server，password幾乎全部都係英文音譯既廣東話粗口。我成日都好好奇：佢教完班外藉同事粗口之後，倒底呢班同事有無發現其實啲password係內有乾坤呢？
Dennis做咗我上司唔夠一年，不過佢教咗我好多野。我最記得佢同我講：「如果你想成功，一係你就令自己好叻；一係你就擴闊自己既圈子，令自己身邊成日都有叻人。」我好清楚Dennis係選擇咗後者，因為通常佢下一句就係問我：「今晚好多人一齊去飲野，去唔去？」
雖然Dennis一直俾我既感覺都好似土生土長既香港人，不過有一次，我終於發現原來佢係「識講唔識睇」。
話說我地幾個同事去食茶餐廳，Dennis拎起餐牌睇下食咩。
「有無英文㗎？你識睇咩？」同事開始揶揄Dennis。
「咩呀。呢個咪個飯字囉。」Dennis不耐煩地還擊。
「仲有咩字呀？」同事繼續嬉皮笑臉地追問。
「呢個咪雞字囉！雞我成日都叫啦！」Dennis衝口而出。
呢一刻，大家都靜咗一下，認真思考Dennis呢一句：「雞我成日都叫啦」既意義。
然後……喺大家爆笑既同時，發現伙計阿姐原來一直企喺隔離，露出尷尬而不失禮貌既微笑。
我諗「識聽識講唔識睇」，大概會成為我地呢班移民下一代既特徵。因為識睇比識聽或者識講要難得多。
假設我地日常同子女都用廣東話溝通，佢地至少每日都有機會練習聽同講中文。但要認到字的話，我想不到閱讀以外既途徑。
MC Jin果首歌其中一句： 「Well，你只係可以怪自己，邊個叫你細個學中文唔俾啲心機」。
我諗我地永遠都係書到用時方恨少。未去到有興趣、或者有真正需要既一刻，小朋友唔會無緣無故地自發想去學中文。不然，我地都唔會有機會間唔時聽到一個個後悔細個無學中文既故事吧。
呢個時候，我諗返起Dennis。或者一切可以由餐牌開始。
「嗱，邊個識得讀哂餐牌上成杯野飲既中文，我就請佢飲。」
「凍黑糖珍珠奶茶。」阿囡答起黎毫不費力。
「Good job！你成功了！」我覺得我既方法湊效了。
「爸爸……個餐牌……其實有英文㗎。」
阿囡呢盤冷水，凍過佢杯珍珠奶茶。
（待續)
