[移民路上的人] (16) 健談的的士司機

公司部門攪聯誼活動,同班同事喺pantry飲飲食食攪到差不多七點。正諗住落樓等巴士,部門主管快步走上黎俾咗張寫住checker cabs既紙仔俾我,然後同我講:「晏喇,call的士返屋企啦。」

我爭啲想話佢知喺亞洲,七點離開公司其實算係早走。好彩我忍住咗。


Checker cabs係Calgary一間的士公司。因為公司開咗corporate account,所以搭的士唔駛俾錢。我打電話去book車,等咗10分鐘,黃色的士就到了。

的士司機係一位黑人,因為我坐喺後座唔係好睇得清楚佢既樣貌。我叫佢做Kobe吧。

交代好目的地之後,Kobe開始撩我傾計。

Kobe:「係呢,你喺邊度黎㗎?」

我:「我來自香港。」

Kobe:「香港係一個好地方!我睇戲見到呢個城巿,覺得佢好靚。」

我認憶中啲西片中既香港一係就俾外星人侵略、一係就俾天災破壞。佢到底係睇咗邊套戲呢?段估都唔係《飯戲攻心》啩?

Kobe:「咁你黎Calgary做咩?出差做野?」

我:「我其實兩年前移咗民黎呢度生活。宜家Calgary係我屋企了。」自己講完都覺得有啲不可思議。

Kobe:「哦!黎加拿大好呀!加拿大係真正種族包容。我以前細個住喺德國,因為我係黑人,成日俾人恰。黎到加拿大之後一啲歧視都無,所以我一直留咗喺呢度。」

Kobe廿幾歲果時搬黎加拿大,一住就係二十五年。

我知道佢既說法不代表所有加拿大人,但我只能說自己黎咗咁耐,好幸運無受過任何歧視。我相信呢個亦係啲人鐘意移民黎加拿大既原因。

Kobe話佢自己住過加拿大好多城巿,但唯獨最愛Calgary。

「因為Calgary氣候好好呀!」Kobe俾咗一個令我意外既答案。

莫講話我呢個來自亞洲熱帶城市既人,連我果啲喺度出世既同事都話有時頂唔順呢度既冬天。

「我以前住過Winnipeg同Edmonton,仲凍呀!呢度幾好呀,冬天都有陽光,又好少有零下四十度。」Kobe補充佢既答案。


我相信呢個世界上好多野都係「相對」的。

Kobe住過更凍既地方,所以Calgary對佢黎講,係暖既。我住咗幾廿年香港,Calgary對我黎講,當然係凍既。

又正如我部門主管一直喺Calgary工作,所以七點離開公司對佢黎講,係晏既;但我喺香港做咗咁耐野OT無數,七點離開公司當然係早。

同樣既比較,仲可以發生喺工作機會、人工、住屋、社會福利、稅收等等等等。

對我黎講其中一個移民後既適應,係要將個比較既角度轉換一下。成日諗呢度人工低,其實有可能係香港人工相對高?諗呢度稅收重,其實不過係香港稅收真係太低?

改變世上所有地方都必需高人工、低稅收、氣候和暖呢種想法,就會覺得呢個移民後既家園,並沒有自己想像中咁唔正常吧?


二十分鐘既車程,Kobe一路同我講野無停過。我好好奇考的士牌係咪要考oral既呢?睇黎的士司機鐘意講野呢個現象係全球性。

去到屋企門口,我睇下個車費錶,要成35蚊加紙。

Kobe:「你有我電話喇!下次出咗街要call車記得搵我!OK?」

望住張35蚊加紙既單,我不禁喺度諗:到底係呢度搭的士貴,定其實係香港搭的士平呢?

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!