[讀家消息] (三) 點解要揀真道?

如果你有睇過我介紹真道呢間學校同埋阿囡小一上學記,或者多多少少會明白我鐘意呢間學校啲乜野。

作為用家,借今回「讀家消息」黎個自問自答,講下當初選校既初衷。

問:點解你會揀呢間學校?

答:揀得直資學校,當然一條龍、課程較自由係好大因素。但最主要既原因係相信真道既「三自」(自學、自理、自省),尤其希望阿囡學到自學既精神,遇到一樣新野會主動去學、唔怕去學,同埋識得點樣自己去學。

校長係迎新日既分享都加強左我同老婆選擇呢間學校既決心,如果你有考慮真道,不妨睇下校長既想法同你夾唔夾。

問:你覺得小朋友有咩特點呢間學校會收佢?

答:真心唔知,我都好想搵返當日in佢既老師問下佢點解會收我個囡,尤其佢第二次面試既表現又唔係真係特別好。真係要講既話我覺得阿囡一大優點係自制能力好好,唔容易失控。

問:你宜家最鐘意呢間學校既係咩?

答:我諗係整體個氣氛吧!校長、老師同埋最緊要係家長都無意催谷小朋友,小朋友係適量既鍛煉、自由既環境下學習。

不過自由不等於容易。你諗下你問老細攞target,佢話:你自己諗諗啦。咁係易左定難左?

問:學校功課量如何?

答:每日大概4-6份,其中有啲係改正之類。佢唔hea半個鐘一定做得完,個問題係實hea架嘛。

但至今為止都無出現過佢能力不及既功課,又或者再直接啲講,比家長做既功課 (e.g.剪報寫感想)。

問:學校默、測、考量同埋深淺如何?

答:一年兩考,測驗聽人講以往有四測,但開學至今暫時只有一測。會不定期quiz,唔會通知,稱得上係防不勝防。

今年既小一只有中英數有考試,其他科例如社會科學都取消左,原因係學校覺得同佢地咁細個考社會科學不過係叫佢記住啲字點寫,無考核佢該科能力既作用。

暫時我覺得學既野唔算太深,以默書為例:中默大約7至8個單字(唔係多筆劃既字) ,英默5至6個vocab同埋4句短句(e.g. What’s that? That’s an umbrella) 。不過高年級既家長分享過會慢慢深起黎,始終呢間學校要十一年教十二年野。

問:學校多唔多活動 (課外活動、家校活動, etc)?

答:學校有一樣野叫做聯課活動,每星期有一日下午比佢地揀一樣課外既活動係上課時間學;然後每星期又有一課「多元智能課」,比佢地接觸多個主科以外既學習課題,例如開學時整下手工,宜家就學緊Spanish。所以我地都暫時無安排好多額外活動比阿囡玩。

問:有咩你覺得學校可以再做好d?

答:可唔可以…. 早少少放學呀….

問:有無其他關於學校既野想同其他家長分享?

答: 有呀,所以先會寫呢個blog嘛。Keep住返黎睇咪知囉。

9 Comments

  1. 多謝你嘅分享呀,大仔下年會讀FS1, 由收到offer開始就經常search下有無關於呢間學校嘅分享,之後開始睇你個blog。老實講報同考嘅時候對真道嘅了解都唔深,完全係被佢有DSE同IB揀吸引左,而家睇左唔少資料,有多小小問題,唔知可否請你分享一下?

    1. 真道英文語境如何?如果第時想讀IB, 應該點樣準備?
    2. 常常聽說真道”過份自由”,以你經驗呢d comment係只邊方面自由?
    3. 哥哥讀真道,細佬妹有priority 嗎?我知道一樣要面試,但會否似其他學校咁會加分?
    問住咁多先希望唔阻你!多謝分享!

    • 多謝你既支持!歡迎加入真道大家庭!

      一路寫reply發現好長…. 唔介意既我直頭開一個post講。比少少時間我!

      • 我仲等緊你既分享架:) (希望無比到壓力你)
        我都一路有追住你寫有關囡囡係真道返學既點滴, 好期待阿仔返小學!
        同埋睇完係既”尋找worksheet的故事”…我決定叫佢自己每次派左worksheet都要自己scan低呀…..果D霉晒既worksheet角實在太恐怖…

        • 想問多句:你所指既過度自由係指邊方面?學習上?品行上?可以再具體少少講下嗎?

          • 唔好意思遲左~
            其實都係爬文見到有家長話某D家長會因為真道”太自由”轉校 (我估相比官津小學?)想知實際情況係點…? 學校對學生的操行,禮貌等有無要求?

          • Dan你好

            唔好意思又好耐先覆你!

            拎交功課呢個例子:真道你欠交二三十次先罸你操行低分d (好似係無得攞A),官津可能唔止係咁簡單?

            我感受唔到真道會用重典去「執」小朋友操行或者禮貌;但我知道有曳既同學犯事,老師同學校一定會處理 (e.g. 罸小息見老師、記過)。

            所以我諗又係果句…好睇你要啲咩。不過如果你希望小朋友係坐定定、返學循規導矩做個傳統乖學生,咁真道我估真係無得同官津比。

  2. 你好
    我想知 當年你兩位小朋友幼稚園亦邊間?
    會一開始因為target直資而選擇私幼嗎?

    • Ty你好

      的確一開始因為諗住考直私所以去考私幼;同埋因為學券幼稚園未必有PN班,又想佢地讀埋PN,所以就揀左私幼囉。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!