[阿囡小二上學記] (五) Work From Home

以前如果一聽人講話「work from home」,第一時間覺得成件事好「Dolce Vita」:好似舒適好寫意好relax咁囉。瞓係度做又得,企係度做又得,開住電視播住韓劇做都得 – 得左。

第一次開始真係work from home源自幾年前join左一間外資公司。當時類似屋企有樣野壞左叫人黎整,覺得請成日假唔係好抵,但又唔知攪幾耐,於是膽粗粗問老細可唔可以係屋企做唔返office。

當時既老闆係一位超nice既美國人,而且我既工種都算係可以remote work到果種,所以佢好爽快就話好。自此之後,一有類似情形,只要開口同老闆老老實實講清楚個原因,而且唔係太密(一個月左右一次),佢基本上都會批淮。例如屋企搵人黎整野呀或者帶小朋友睇醫生,老闆都會ok。

公司其實都一直有呢個文化,由於當年佔中返唔到office,所以IT部做左好多野make sure每個人都可以remote work;公司仲會每年都有一日要你地work from home,測試一下我地既應變夠唔夠。

到左上年工作環境有啲轉變, work from home既時間更長;基本上一個星期都有兩、三日會係屋企做。所以work from home對我黎講都唔算太陌生。

除左宜家。

以前work from home,起碼都有一個半晝屋企無人,因為上晝兩隻monkey都返晒學。所以上晝通常都係比較productive既時間。就算晏晝阿仔放學,一來佢要瞓下晏覺,二來就算佢嘈,我最多落樓下自修室做,所以都算sustain到。

但自從武漢肺炎之後,兩隻monkey日日係屋企同我困獸鬥,所以由朝早起身到夜晚都好難集中做野。我相信好多家長應該都同我一樣有一個好矛盾既感受:一方面感謝公司俾佢地唔駛撲口罩返工,減少感染機會;但另一方面又好stress,因為當你出現係屋企,你無可能當個小朋友無到咁做野。就算你得,你個小朋友都會不停咁搵你。

除左點分配時間邊做野邊睇住佢地,仲有另一個問題:資源分配。兩個間學校都各自有少少野要用電腦睇,例如阿仔間幼稚園就每日有YouTube,阿囡又會上網做下學校推介既平台。平時叫佢地做第2樣野,例如刷牙,大家就好「禮讓」:「家姐做完先到我啦」、「弟弟做左先啦」,但一到用電腦做功課,就「為善不甘後人」,慢對方一秒都唔得。如果唔係屋企好彩夠電腦真係爭先後都有排拗。

當然,係香港地最麻煩就係空間分配啦。屋企咁細,一時大果個又話細果個攪住佢,一時細果個又話大果個睇片嘈住佢。每分鐘都有投訴,做拳証做到你人都癲。

所以宜家如果無人約開會無野趕,我既上晝都差不多要放棄工作咁滯,最多夜啲自己追返。但我都算好彩,至少可以調度一下;我相信好多人係無咁既空間,一定要邊做邊睇住小朋友,有啲可能仲係back to back咁不停開會。事實上同啲朋友傾計,有人話其實work from home開會時間反而多左,因為以前都要轉下meeting room行出行入,宜家press個button轉個conference ID就入左第2個會了,所以開到既會其實仲多。

我相信經此一「疫」,大家應該聽到話「work from home」,應該都會敬謝不敏了。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!