陳守仁（全名保良局陳守仁小學，或稱TSL）一向口碑都係平靚正、語文能力好既直資學校。點平法？一年學費15K（唔係話15K唔係錢，但當其他直資收緊你起碼30K既時候…)。雖則位置唔多就我腳，不過見佢開放日又唔駛book一於帶埋阿囡去睇睇。
學校交通
當日我係搭地鐵去到油麻地再行入去，拖住阿囡行左都成20分鐘。Forum d人建議搭地鐵去到奧運站好d，但若你好似我咁去奧運唔多順路，去到油麻地搭43M小巴可免少少腳軟之苦。
開放日內容
去到學校其實都好多人下，一行入操場就已經撞到同學仔，於是一齊上樓上搵野玩。成個開放日既設計基本上係係d班房同特別室set左唔同既遊戲、展覧同埋示範比你地睇同玩。雖則無蔡繼有個開放日咁誇張有埋吹氣彈床玩，不過夏日炎炎走入d班房涼住冷氣玩好過出去曬。
行上一樓一個好似花圃咁既地方見到唔算多人排隊就同阿囡玩左呢個小型golf；個姐姐好好心機咁教阿囡打，可惜阿囡都係辜負左佢打極都唔中。
打左兩下已經出晒汗（唔知點解佢打但我出晒汗）於是決定捉返阿囡入返現代化（有冷氣）既地方。
功課展覽
每次去呢d學校開放日我都好留心間學校d功課係點，一來想知間學校點評估個小朋友，更重要係想知道自己未來要花幾多青春同佢典功課。
係度比幾份大家睇下你覺得要多少青春：
大學就好多時有Final Year Project (FYP)；但小六FYP你見過未?
環保自製遊戲
跟住入左幾個班房有好多唔同既攤位係d學生自己用環保既材料整左好多唔同既game比小朋友玩。
例如有呢個衣夾雪條棍變飛機：
仲有呢個比你碌粒珠仔既小遊戲：
STEM
玩完d自製game入左另一個班房係玩STEM主題既，呢個demo係講你program左個robot等佢識跟住條路行:
呢2個哥哥好落力咁demo佢地個機關點郁個波，都其實demo得幾好，阿囡都企定定睇左陣。
仲有呢個叫做mBot既現成robot比你學下program －唔記得問幾年級先開始玩:
尾聲
玩左一輪落返操場見到有得畫面；阿囡好想畫，於是同佢排隊等。等緊果陣見到佢地個notice board列左上年佢地學校既升中派位成績（因為佢地唔係龍校）：
畫面最終原來發現都係由陳守仁d學生幫你攪 －唔好expect有出街玩果d水準，但個姐姐真係好好心機幫阿囡畫。
畫埋塊面4點左右學校都差唔多close就打道回府了。
後記
去完既感覺係 – 覺得學校d學生好強，功課唔淺，中間幾個科學demo都幾印象深刻。睇埋去開放日既人數…心裏面自動有少少覺得阿囡都係陪跑居多。
