[阿囡小一上學記] (三) 英文默書之化功大法第一層

老婆要出差,自己「獨守空房」相當忐忑,因為老婆就好似大家公司啲IT一樣:佢係度啲野好地地,佢一行開就所有野自動out of order。再加上大家如果有睇上兩集都知宜家仲做緊「walking dead」嘛, 你話我有乜法子唔餚上加餚。

到左星期日,老婆出發了。

之前果晚已經同阿囡講好:若然我地係指定時間內做好晒要做既野,下午就按佢要求去溜冰,否則就留係屋企。要做既野包括:

  1. 睇兩本佢係學校借既圖書
  2. 畫一幅畫 (自由創作)
  3. 溫習英文默書 – 暫時都係大約一至兩星期左右默一次英文

我明白大家對「多野做」既定義都不一樣,不過我估睇到呢度,可能大部分人都會話:「嘩,你好幸福」。至少聽過其他媽媽既故事後,我自己係咁諗。

阿囡結果一早起身快快手做完第一同第二項,剩返英文默書我同佢溫。之前星期五、六其實都分別同阿囡溫過又試默過,到左今日重默,諗住好快收工,奈何事與願違。

基本上我地要默4句英文短句 (e.g. What’s this?),看似容易,但我相信大家可能都有呢個經驗:第一次啱A錯B,溫返B之後第二次就啱B錯A。覺得自己無學過佛係無法參透點解佢啲答案咁「無常」:5 分鐘之前啱晒,5分鐘之後化功。

阿囡彷佛係要試晒所有錯既組合一樣,每次重默都帶來「新鮮感」。再望下個鐘開始掙扎起來:之前講好要做晒所有野先去玩,但睇得出佢已經有用心去做,係咪真係要拘泥係果一兩句錯字?

最後我同阿囡講左句:「返黎再溫啦」,之後就照約定帶佢出去玩了。

係溜冰場同阿囡過左一個美麗既下午。我同阿囡其實都唔識溜,全程跌跌撞撞。有個小朋友輕鬆越過我既時候回望我同我四目交投,完完全全能從佢眼神入面讀出:「唔識就閃埋一邊啦阿叔」。雖然有啲不是味兒,不過見到阿囡一直hyper,跌極都會展現出燦爛既笑容,就覺得好彩有帶佢黎玩。結果玩左差不多兩個鐘,食埋個甜品先返屋企。

臨訓前,我忍唔住又捉住阿囡再重默多一次,睇下佢係咪已經練成化功大法。結果不出所料:仲化得好徹底添。我忍唔住開口話佢,豈料佢雙眼漸紅起來,然後悻悻然地講左句:「原本今日玩得好開心架…」

一聽到呢句說話個心好唔舒服,覺得自己好似同女朋友過左難忘既一日,然後係最浪漫既一刻佢話要分手咁。結果說不出話來,只係知道見到佢副倦容要叫佢快啲返房訓覺。之後係度諗:如果老婆係度處理或者就不一樣了。

最終同到到左埗既老婆傾左陣,講返件事比佢聽。老婆安慰說:如果係佢,或者一早已經丙到阿囡七零八落了吧。心中幻想左一下果個畫面,多多少少釋懷了一點,同時又暗嘆:老婆幾時返呀…

3 Comments

  1. 我囡岩岩收到offer, 十五十六讀唔讀真道,剛發現你個post, 有好多資訊,實在太好了。希望大家小朋友係真道讀得開心!

    • 恭喜你!講真每個小朋友都唔同,我都唔知我同阿囡既經驗係咪applicable到落其他人身上。不過希望寫既野幫到你啦!預祝新學年升小愉快!

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!