Skip to content

[升小故事] 地獄折返人間記 (四)

經過連番惡鬥,CC媽同阿囡終於黎到佢地揀既「111」小學藍田德田李兆強叩門面試。CC媽慶幸間學校好體貼,因為當時正值打風,學校對打風既面試安排係email度解釋得相當清晰。

去到學校,主任提醒家長無論小朋友面試結果如何,小朋友出黎既時候記得要鼓勵同讚賞佢地,因為佢地人仔細細要去面試其實已經需要莫大勇氣。CC媽心想:不能認同更多。

藍田德田李兆強既叩門面試分成三輪,面試過程真係仲緊張過踢世界盃 – 因為三輪係同一日進行,得既即時晉級次輪,唔得即時淘汰可以打道回府。

CC媽係課室外面等,心裏響起從未出現過既祈禱內容:「唔好咁快出黎,唔好咁快出黎…」;過左十分鐘,CC媽開始見到有小朋友行返出黎,同時開始見到一張張來自家長失望既面容。雖然主任提醒家長唔好責怪落選既小朋友,但我諗係十分鐘之內由盼望變失望,無論係大人定小朋友都實在好難掩飾果一種失落。

等下十分鐘,等下又十分鐘,CC媽少有地只希望唔好咁快見到個囡。結果如CC媽所願,過左差不多一個鐘,CC先出返黎。CC媽見到CC身上有幾張貼紙,同時又滿面笑容,再加上CC係最後一批離開既學生,心裏面已經知道佢應該去晒三輪面試,而且仲面見得好好。

CC果然同CC媽講個英文老師話好鐘意佢,自己亦有同個老師話佢好鐘意間學校;另外答數學題亦全部識答。CC講返比CC媽聽考既題目原來亦唔淺,數學題已經係問緊雙位數加數(有進位),英文亦有考對答,不由得再一次對阿囡既表現感到自豪。

事實上,佢地既努力終於有回報,而且黎得好快。

上午一見完,藍田德田李兆強下午就已經通知取錄CC做佢地新學年既小一生!

之後CC媽都有陸續收到唔同學校既面試通知,不過CC媽都無再同CC參與。CC媽亦証實左某啲所謂要111既學校,其實最終都唔係必要,因為佢無揀到做111既學校都照有向佢發出面試邀請。

油塘基法通知有第二輪面試,及後參加完將軍澳天主教小學2nd in亦收到offer,不過CC媽都係始終堅持選擇呢個得來不易既111學位。

經歷叩門階段既一場龍爭虎鬥,最終輾轉間得到大抽奬原本想得到既首選,CC媽慶幸自己終於返回「人間」了。

不過,如果你以為呢個故事就係呢度完結,咁你就錯了….

(待續)

Photo credit: Kenaz @ Flickr

呢D應該都啱你睇

地獄折返人間記 (二) 經過一番直私面試既折騰,然後再係大抽奬抽到無乜可能抽中既第廿幾志願。故事既第一部分對CC媽,相信有如...
地獄折返人間記 (一) 呢個係一個真人真事,一個阿媽(姑且稱佢為CC媽)「來回地獄又折返人間」既升小故事。 2018年...
地獄折返人間記 (五) 由CC媽係大抽奬抽到廿幾志願到後來考到「111」 叩門學位重返人間,我都以為呢個升小故事會就咁大團圓...
地獄折返人間記 (三) CC媽第一間叩門既小學其實係藍田既聖公會李兆強小學。原以為一矢中的,奈何又係最後關頭臨門失控,CC媽...

Be First to Comment

發表回覆

你的電郵地址並不會被公開。 必要欄位標記為 *