[姐弟海外升學記] (五) 久違了的面試

  •  
  •  
  •  
  •  
  •  

我其實一直都唔係好相信阿囡既面試能力。因為佢好細個由考PN開始,我已經睇過好多次佢面試時侯既表現。

「鵪鶉」係我第一個會諗到既形容詞。

廣告
Loading...

不過,阿囡到考小學既時侯,唔知點解又好似脫胎換骨咁。我記得喺一個簡介會上,我撞到阿囡同學仔個爸爸,阿囡同佢個仔都咁啱入左真道面試既round 2。我同佢講我其實好擔心,因為阿囡太慢熱了。呢位爸爸當時講左呢番說話:「或者我地都未必知道學校到底係點揀啲小朋友,但既然學校揀得佢地,佢地必有過人之處呀。俾啲信心佢地就得㗎啦。」

當初我地諗住阿囡charter school既申請好straight forward、好快會有結果,點知中間出現好多波折:例如學校話份報名唔合佢地個標準,老婆又要去搵個醫生clarify又要補充資料,攪左好耐先攪得掂。因為花左唔少effort,所以我地亦由原本覺得有得in就in、無就算,到後來真係有少少期待。

我地什至喺學校未出結果就已經book定機票去加拿大,一來因為如果等學校出結果先book可能book唔切,二來諗住就算無得in,當去探親玩下都好啦。

當我地終於收到charter school既面試通知,開心之餘都算係鬆一口氣。

雖然我地好重視今次既面試,不過基本上我地無同阿囡做任何preparation。一來同香港既面試唔同,我地無乜資料可以參考。二來我地覺得外國既面試應該唔會考學術野,無乜野可以預備。三來根據喺香港既經驗,我地覺得點prepare佢都無用 – 俾佢自己自由發揮好過同佢太多preparation令佢仲緊張。

所以學同學仔個爸爸話齋,我地做既野只有一樣:「俾啲信心佢就得㗎啦」。

我地舉家提早幾日過左去加拿大諗住等大家適應一下時差;老婆每日帶住我地四周圍去睇下玩下,亦認識下呢個地方。我地亦第一次真正感受到呢度嚴寒既天氣 – 零下二十度……我當時仲喺度諗:我其實放啲凍肉出街係咪保鮮過放喺雪櫃?

休息同玩左幾日,終於到左interview既日子。我地一行三人一早就喺屋企出發,驚要搵路。當日都係好凍,而且地方空曠,落左車就一陣陣冷風吹過黎,我諗原本未瞓醒既阿囡都應該會精神為之一振吧。學校附近只有一街停泊咗既車同埋看不見人既房屋,加上落雪後一片白茫茫,令人覺得呢度份外寧靜。

我其實從來無去過外國既學校,一推開校門入到去,令我覺得有少少似去左以前大學果幢教學大樓咁,唔似香港啲小學。秘書安排我地坐低等侯,發現隔離已經坐左一個一家三口既家庭,操國語口音。因為阿囡去考呢個位其實係一個插班生位,呢位小朋友應該係另一位考生。

好快呢位小朋友就被邀請入去見老師。除咗喺度諗個老師會問乜之外,同時又開始胡思亂想:呢個小朋友好似骨骼精奇,成個七省狀元咁既款。如果要同佢爭,阿囡今次係咪無運行呢……

廣告
Loading...

不過喺我未有機會繼續沉溺係我既幻想之際,七省狀元連十分鐘都唔駛就見完老師了。我既幻想又再次騷動:晤…莫非…佢答得唔好,所以咁快就收工?不過見到七省狀元好開心咁同佢父母咁傾計,又覺得佢信心十足。

阿囡緊接住入去見老師,我同老婆都向佢輕輕一笑叫佢放鬆啲入去,不過可能果一刻係我同老婆仲緊張過佢。我同老婆開始回想返阿囡喺香港考小學既往事,諗起果時果種患得患失既心情,又再諗起知道佢考到真道果時既喜悅。

我覺得…好似比七省狀元入去既時間更短吧,阿囡已經行返出黎了。有無in左五分鐘?去QBHouse剪頭髮都無你咁快喎?

阿囡緩緩地行到我地面前,依舊帶住佢入去前既poker face,令我同老婆更加好奇佢頭先既interview進行成點。

我:「點呀頭先緊唔緊張?同老師傾左乜野?」

囡:「少少啦,都係就咁同個老師傾下計咋。佢問下我呢度識唔識人,同埋問我點解要黎加拿大讀書囉。」

我地見阿囡好似無意繼續講落去,我同老婆都無再問落去了。

「俾啲信心佢就得㗎啦」。

況且,老師問既呢條問題,的確係一言難盡。

(待續)

Photo credit: Katja Sea

廣告
Loading...


  •  
  •  
  •  
  •  
  •  

Leave a Reply

想睇到最新內容?

歡迎讚好「好校爸」Facebook專頁!