Skip to content

[阿囡小一上學記] (二十一) 三自的反思

「自理、自學、自省」係阿囡間學校稱為「三自」,係學校重要既教育理念,亦係我同老婆當初選擇呢間學校其一主要理由。我地希望阿囡學識照顧自己,自發咁去學野,而且會時時檢討;除左想阿囡返學可以學到學科知識,更想佢學識「三自」既態度。

學校之前有一期家長通訊以「如何培育出自理、自學、自省的孩子」為題,俾家長投稿分享下自己點樣培養出有「三自」既小朋友。歸納其他家長們既心得:

  • 自理方面,將生活交還返俾小朋友,放手俾小朋友管理好自己:無論係起居日常以致時間、金錢什至情緒,要小朋友明白自己有責任將佢地管理好
  • 大家一致認同閱讀對自學既重要性!從小陪伴佢地睇書,培養佢地閱讀既習慣,幫小朋友發掘閱讀有趣既地方
  • 學習並非只有考試學術一途。俾小朋友係生活上多啲體驗更加難能可貴,又或更能引發佢地自學既興趣
  • 父母要作為引導者而唔係決定者,俾小朋友多啲空間自己去摸索下;多啲同小朋友回顧佢地做既事情同分享經驗,等佢地有機會學習自我反省

講返阿囡。返左大半年學,阿囡對「三自」精神吸收成點呢?

自理方面,除左日常起居生活,返左小學其實阿囡已經多左好多要管理既項目,例如係啲工作紙。經過左大半個學年我明白要阿囡留下一張完整既工作紙係無乜可能,但至少要佢明白保護工作紙既安危係佢既責任。或者佢大啲話想養寵物果時我會同佢講:你養到自己啲工作紙肥肥白白先啦。

自學方面,如果好似一眾家長咁講話閱讀係培養自學既基礎,阿囡算係中規中矩吧。因為係屋企都算有見佢睇書,又聽佢話小息會約同學去圖書館借書返黎睇,相信要佢睇書唔係太大問題。

不過,我其實更希望阿囡可以搵到一樣令佢好passionate既興趣,唔一定要同讀書有關,但呢樣野可以令佢日思夜想有動力想做,咁佢先算真正領略到自學既精神。簡單啲講,就係要佢學識沉迷一樣野。

自學難,但自省我認為更難。除左阿囡都仲細未必有自覺時刻檢討,另一更大原因係佢通常未開始自省就已經「被省」。正如你返工,你有幾可同老闆講:「唔好鬧住,我爭3分鐘就反省完架喇」。

如果問我點樣培養出「三自」既小朋友,我諗我首先要做到「三收」:「收手、收口、收火」。「收手」 – 減少幫佢,等佢多啲自己領會;「收口」 – 唔好成日話佢,俾多少少時間空間佢反省同進步;「收火」 – 基本上呢個做唔到,咁都好難收手同收口啦……

當然,最有說服力既教育,大概係我自己先做到「三自」吧。可惜既係我暫時最多只係做到「兩自」 – 自暴同埋自棄。

咁樣算唔算係自省?😅

呢D應該都啱你睇

(十七) 新年習作之模型車 漫長既新年假期來了,伴你成長既唔係「時興隆」,而係假期作業。阿囡既假期功課唔算多,但當中有一份令我...
(八) 校長:42日建立一個好習慣... 上次聽完資深家長既分享之後,今次輪到曹校長主講家長晚會。 校長呢一晚既講題叫做:「Think ...
(六) Season 1 finale:兩默一測的一星期... 你無睇錯,真係season 1 finale。 阿囡間學校全年分開5個學期(佢地叫做學段),1...
(十九) 找錯處 大家細個有無去機鋪玩過一個遊戲叫做Photo Hunt? 遊戲機畫面會出兩張圖,你要係限時內用手指...
(十六) 英文考試的溫馨提示 阿囡間學校放完聖誕假就大考,考完中文科之後就輪到英文科。 一如上次溫習中文科,同阿囡拎左範圍...
(五) 係電子學習定係打機? 記得當日去優才2nd in既時候,老師問:你點睇電子學習? 我係唔抗拒電子學習既,大勢所趨嘛。...
(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...

Be First to Comment

發表回覆

你的電郵地址並不會被公開。 必要欄位標記為 *