Skip to content

[阿囡小一上學記] (二十三) 轉變

我係一個好怕轉變既人。我打過一份超過十年既工,同親啲後生既朋友講大家都會覺得「吓,唔係掛」。食lunch基本上食過一次覺得穩陣就會個個星期幫襯仲叫返同一樣野食,因為「我點知一變佢俾碟咩我食呀」。

踏入4月開始有一啲轉變發生係我身上,令我感到前所未有地茫然、緊張同不安。與此同時,返到屋企對住阿囡,又發現佢既轉變同樣令我不知所措:以前既小乖乖變成今日一言九「頂」;每次無論係教佢、勸佢定係話佢都係換黎一張「你好煩呀」既表情。

種種轉變令自己時而煩燥時而失落,悶悶不樂左幾個星期,連出個post都感到無力。

啱啱既星期五係阿囡學校最後一次既家長講座,請左正生書院既陳兆焯校長黎同大家講下「管與教的博奕」,意想不到聽完之後,得到一番新既啟發。

因為陳校長所講既,正正就係點樣面對轉變。

你有無諗過上網賣真槍搵錢?你可能第一個問題係:邊度搵支真槍返黎?而當我地仲未攪得清楚呢件係咩一回事之際,如果你個小朋友同你講佢已經做緊呢件事,你會點?

呢件其實係真人真事。陳校長話佢朋友個仔就係單靠上網做左呢件事賺左40萬。上Youtube學點砌槍,跟住係唔同地方(e. g. 克羅地亞)買材料返黎砌,砌完仲識奄左支槍 (即係支槍唔射得既)先上網搵買家。佢賣既唔係一件殺人工具,而係經佢悉心安裝同修飾既「收藏品」。

當我地仲以為internet係俾我地用黎睇「安心偷食」,我地既下一代已經用緊我地完全意想不到既方法係度搵緊食。

原來已經唔係講緊放唔放手既問題,而係…你無得唔放手。

因為世界已經變了。

因為所謂既「你果套」,無論以前幾work,好快都有機會唔work。

例如陳校長話:以前啲阿爸駛乜去聽家長會?阿爸係屋企俾個眼神你,你已經唔敢郁了。以前阿爸係食飯要食先,返到屋企淨係歎報紙。但宜家仲work嗎?

而且唔止世界會變,人都會變。

忽然驚覺…或者自己既煩悶無力,除左係來自以為「好地地」啲野唔會變既果種天真之外,更加係因為缺少左從容面對轉變既勇氣。

我相信阿囡未來最需要學會既,唔係DSE考啲咩,而係呢一種面對轉變既勇氣。因為未來世界既變化,肯定俾宜家快得多、激烈得多。

不過,我又相信儘管「變幻原是永恒」(btw…真係好服霑叔既詞),但正如陳校長係講座入面講既一句說話:「屋企唔係講道理既地方,而係講愛既地方」- 屋企人既愛,大概就係一種唔會改變既力量吧。

Be First to Comment

發表回覆

你的電郵地址並不會被公開。 必要欄位標記為 *