Skip to content

[阿囡小一上學記] (二十) 暖心的親子習作

曾經講過我好怕做親子習作,但凡事總有例外。

阿囡學校有一個科目,份份功課都要「親子」- 即係要家長一齊做,但我不單唔抗拒,甚至係「有少少鐘意左佢」。

邊科咁犀利?

呢一科叫做「天倫教室」,係學校既「家庭生活教育」課程。呢科我覺得有少少似我地細個讀既社會加健教科,不過佢地教小朋友唔淨止以個人角度,而係點樣以家庭既角度去睇自我同埋個社會。

成個課程由小一教到中學畢業 (十一年),課程會教呢五大範疇:人際關係、家庭資源管理、家庭透視、心性教育同埋個人成長和發展。

例如啱啱開學既時候,呢科既主題叫做「請你跟我做朋友」。顧名思義,呢一課鼓勵學生去到新環境主動認識新朋友;堂上設計左個活動俾同學互相認識之後,返屋企份功課就係叫小朋友介紹返係堂上認識左既同學俾家長聽:

我幾鐘意睇阿囡呢科啲功課,因為平時同阿囡check功課係一個找錯處既遊戲,著眼點係佢有無錯同有無發夢;天倫教室既功課相反唔會有對錯,而係著重於反映小朋友對人對事既想法。睇住呢份功課,反而係俾左一個好好既機會我了解多啲阿囡既內心世界。

例如下學期有個主題叫做「多元優點逐個捉」。呢一課俾小朋友發掘自己既優點,學識欣賞自己。份功課列出好多種唔同既優點(例如外貌上、能力上),俾小朋友剔:

一路睇一路發現原來阿囡對自己係幾有自信:基本上全部優點都剔晒。

去到工作紙最尾有一part叫做「我的反思」,其中一條題目問阿囡「完成以上活動,你覺得自己…?」。

唔睇都唔會估到阿囡會覺得自己寫字進步左,因為佢寫「我寫字進步左」呢幾隻字本身已經寫得幾肉酸。

不過無論阿囡寫啲咩份功課做成點,老師總係會係份功課度俾好多鼓勵佢既語句:一時會叫佢俾心機加油,一時會讚佢、肯定佢所寫既內容。再加埋每一份功課都必然要家長寫既「愛的回應」,令我每次返睇返呢一科啲工作紙都覺得好暖心好溫馨,成個人啲正能量出返晒黎一樣。

當然,呢科既功課仲有另一個成功因素:家長寫果part真係豐儉由人..起碼做起黎無咁大壓力嘛。

呢D應該都啱你睇

(六) Season 1 finale:兩默一測的一星期... 你無睇錯,真係season 1 finale。 阿囡間學校全年分開5個學期(佢地叫做學段),1...
(二十一) 三自的反思 「自理、自學、自省」係阿囡間學校稱為「三自」,係學校重要既教育理念,亦係我同老婆當初選擇呢間學校其...
(十四) 視藝科參觀之「動物大觀園」... 學校既視藝科被稱為綜藝坊,功課政策同學校本身一樣自由,同學一個學期內做四份題材不限既作品就可以了,例...
(十六) 英文考試的溫馨提示 阿囡間學校放完聖誕假就大考,考完中文科之後就輪到英文科。 一如上次溫習中文科,同阿囡拎左範圍...
(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(十七) 新年習作之模型車 漫長既新年假期來了,伴你成長既唔係「時興隆」,而係假期作業。阿囡既假期功課唔算多,但當中有一份令我...
(十) 社會課:叮噹同你共建社區樂滿FUN... 當初睇通告見到「共建社區樂滿FUN」既時侯,以為係某電視台既節目,類似歡樂滿東華啲friend。 ...
(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...

Be First to Comment

發表回覆

你的電郵地址並不會被公開。 必要欄位標記為 *