Skip to content

[阿囡小一上學記] (十一) 中文課:句子小工房

平時一聽到工房呢兩個字,一定係同食有關 – 吐司工房、麵包工房、半熟工房、健康工房等等等等….而且多數都係輕食系列。

所以當老師開始呢節小一中文課觀課「句子小工房」既時侯,都特別同小朋友講呢堂唔係整野食,而係教大家一齊「炮製啲句子」。一路聽一路覺得好肚餓。

雖然唔係整野食,但老師呢節課倒係幾有烹飪課既味道。首先教小朋友材料:一句句子由啲咩構成,再教點煮:有咩句式將啲材料連埋。最後叫你自己煮埋:分組每組作一句句子。

老師打開PowerPoint,拎返佢地暫時學過既課文句式黎教佢地句子既構成。發現呢間學校啲老師除左攪笑之外,另一特點係佢地整PowerPoint 好pro(社會課既PowerPoint一樣強勁)。爭啲想舉手問可唔可教我點「炮製啲PowerPoint」。

小朋友聽完老師既講解,老師跟住就叫佢地拎左張紙出黎。遠睇見張紙上面有一個黑色圖案,然後猛然醒起之前同阿囡尋找worksheet 既時候有見過,類似咁既樣:

畫面上跟住出現左一條多項選擇題,內容係問返題目上既句子屬於啱啱教既邊種句式。畫面右手邊同時列出左所有同學既名。

有趣既事開始了:同學陸續將佢張白色紙舉起,老師攞出手機,然後慢慢係同學面前移動。畫面上同學既名字一個接一個咁變色,原來同學拎住張紙既方向代表佢選既答案(ABCD),老師個手機就用黎掃描每個同學既答案。

掃完同學既答案,老師開估真正答案;同學個個都好投入,答中既同學興奮大叫,YEAH聲不絕於耳。另一個有趣之處,係老師係手機度即時就知道到底有幾多同學答啱,老師可以因應同學進度黎調節課堂內容。無諗過電子教學可以係中文科度咁樣運用,當然老師既準備功不可沒。

老師檢視完同學既進度認為大家都ok,於是進入下一個環節:同學分組造句。不過老師又有新意思,將呢個分組既練習變成一個唔殘酷既「殘酷一叮」 – 老師叫每一組同學出黎present佢地做既句子,其他組既同學就負責俾分;作得好好既俾個叮叮佢,作得麻麻都俾個心心鼓勵下,最後睇下邊組最高分。

同學都踴躍參與而且都唔吝嗇分數,結果老師用左奬門人既慣例結束左呢場比賽:全部組打和。

係同學既歡笑聲中「句子小工房」呢節中文觀課正式完結。係度諗上到高年級呢個小工房會唔會變成「作句廚房」?或者到時老師可以同啲同學上堂一齊唸呢句:「作句廚房,作左先講!」

呢D應該都啱你睇

(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...
(一) Walking dead之season 1 九月三日,阿囡終於開學返小一。 睇住著上校服既佢,並未有「終於大個囡啦」的感慨;畢竟佢間學校件...
(五) 係電子學習定係打機? 記得當日去優才2nd in既時候,老師問:你點睇電子學習? 我係唔抗拒電子學習既,大勢所趨嘛。...
(七) 家長分享:生果論 話咁快就一個學段結束;覺得自己仍然係未適應到「阿囡返左成個學段仲適應緊」既事實。學校咁啱攪左一個家長...
(十四) 視藝科參觀之「動物大觀園」... 學校既視藝科被稱為綜藝坊,功課政策同學校本身一樣自由,同學一個學期內做四份題材不限既作品就可以了,例...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(八) 校長:42日建立一個好習慣... 上次聽完資深家長既分享之後,今次輪到曹校長主講家長晚會。 校長呢一晚既講題叫做:「Think ...
(十三) 2018升小大小事回顧 2018年黎到尾聲,電視台都會黎個年度大事回顧,所以我亦唔例外。 2018既升小之路其實算係風...

Be First to Comment

發表回覆

你的電郵地址並不會被公開。 必要欄位標記為 *