Skip to content

[阿囡小一上學記] (十七) 新年習作之模型車

漫長既新年假期來了,伴你成長既唔係「時興隆」,而係假期作業。阿囡既假期功課唔算多,但當中有一份令我一睇到就有少少頭痛。

呢份令我頭痛既功課其實係數學科既一張工作紙。之前阿囡係數學堂學左唔同既立體圖形(e.g. 錐體、柱體),今次呢份功課就係要佢地用唔同既立體圖形整架模型車出黎:

一睇就覺得呢份功課好「親子」下 – 尤其是阿囡一向十分不擅長呢啲剪剪貼貼創作系列,今次仲係要整架車。咁即係話一定要家長 – 即係我,陪佢一齊做啦。

我其實都好怕呢類型既親子習作,成日覺得好難拿捏小朋友既參與程度。叫佢自己做對阿囡黎講真係好有難度;但到你出手又覺得其實真係我做多過佢做,認真矛盾。

另外,大部分呢類功課都鼓勵大家用環保物料,但好人好姐無人會儲廿幾個廁紙筒同四十幾支雪條棍係屋企嘛,結果有時要為環保而浪費。所以做左咁多次親子習作,最環保果次就係屋企細果個將家姐以前份功課「循環再用」,成份直接拎黎交功課。

再加上我本身手作能力認真麻麻,次次要我拎啲膠樽呀筷子呀咁去整舊野我都係不得要領。每次幾經辛苦整完開始有少少自信既時候,去到學校見到同學(既家長)果啲作品,就好想搵窿捐。

好,呻完。開工。

睇完工作紙個「brief」,物資部(老婆)好快手已經拎左屋企有既環保物資出黎。我同阿囡睇左陣,心入面大約有個想法,於是就畫左個好草既草圖。工程部(都係老婆)睇完都覺得okay,然後兩三下就七拼八湊砌左個初型出黎了。

一遇到呢類親子習作,我地通常都係將「整靚佢」呢一個重要既任務交俾阿囡。係阿囡好用心準備幫架車扮靚靚既材料既同時,我同老婆已經差唔多將模型車主要既部分準備就緒。最後我地將材料同埋佢既裝飾交俾阿囡好似砌模型咁合埋,模型車就大功告成。

雖則做之前呻左一輪,做完既製成品又同當初心目中所想相去甚遠,但親子習作最正面同最奧妙既地方,在於你同小朋友一齊合作做完之後,成件事好fullfiling。而你亦唔會好似平時一樣係度嫌佢份功課呢樣唔好果樣唔好,因為做得衰…你有份架嘛。

砌完之後未完架,工作紙上面仲有幾條問題俾小朋友思考下。

阿囡睇完呢幾個問題後滿腹疑問,睇黎我都係要出手俾多少少指引佢:

問題1:哪些因素使模型車能被人手推動?

答:幸運及天父的眷顧。

問題2:完成這個活動後,你學會了甚麼?

答:成功靠父幹。

問題3:活動中遇到那些困難或問題?你如何解決?

答:活動中遇到的主要困難是爸爸。我很快便叫了媽媽來,然後便解決了。

呢D應該都啱你睇

(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(十三) 2018升小大小事回顧 2018年黎到尾聲,電視台都會黎個年度大事回顧,所以我亦唔例外。 2018既升小之路其實算係風...
(十四) 視藝科參觀之「動物大觀園」... 學校既視藝科被稱為綜藝坊,功課政策同學校本身一樣自由,同學一個學期內做四份題材不限既作品就可以了,例...
(七) 家長分享:生果論 話咁快就一個學段結束;覺得自己仍然係未適應到「阿囡返左成個學段仲適應緊」既事實。學校咁啱攪左一個家長...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(二) 小學生都要跑數? 阿囡開學一個月左右,放學食完飯過後雖然有時仍然處於walking dead遊魂狀態;但平心而論,其實...
(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(三) 英文默書之化功大法第一層... 老婆要出差,自己「獨守空房」相當忐忑,因為老婆就好似大家公司啲IT一樣:佢係度啲野好地地,佢一行開就...

2 Comments

  1. 白賴仁 白賴仁

    一直有追看[阿囡小一上學記],從你嘅分享裏,能夠睇得出」真道」真係一間非常符合我同太太教育理念嘅小學。睇完呢篇之後,真係忍唔住要表達下對於最後三條答案嘅共鳴!
    阿囡而家仲等緊waiting,希望快d 收到好消息!

    與此同時,繼續期待你的分享!

    • 好校爸 好校爸

      白賴仁你好!

      多謝你既支持同埋鼓勵!真係好開心聽到真係有人會「追」呢個故事,更開心係能夠將真道既精神分享到俾更多「同路人」。

      哈哈我估呢一篇多數爸爸都會有共鳴吧!畢竟其實呢類親子野早在幼稚園已經好多…爸爸們可能一早已經係度大顯身手中。

      係度祝你好快收到好消息,我會繼續努力分享,請繼續支持!

發表回覆

你的電郵地址並不會被公開。 必要欄位標記為 *