Skip to content

音小面試

聽完音小簡介會同埋簡介會既答問,覺得陳校長都幾有heart; 學校感覺唔谷,環境亦唔錯,加上阿囡又鐘意音樂,所以報左名同佢參加音小面試。

交通

面試約左係6月10日星期六既早上。我地一家3口搭地鐵去到鑽石山,跟住係C2出口既荷里活廣場公共交通交滙處搭19M小巴,大約5-10分鐘係蒲崗村道學校村站度落車就到(個站係正學校門口)。

面試需知

係面試通知個email度有兩點要留意:

  • 要係面試時間30分鐘前到達學校登記
  • 要print同埋帶面試通知信 (hard copy)

面試流程

我地同阿囡準時黎到音小,入門口已經有指示叫你去操場度排隊。報到完老師帶左阿囡成班(大約6 、7個小朋友一組)上樓梯去玩;我同老婆就跟住去第二個班房見老師。家長面見由於好快攪掂 (10分鐘),見完老師之後去一樓圖書館度等小朋友果part完接返小朋友就走得。

面試內容

小朋友面試

小朋友面試方面,面試個通知email係咁寫既:
「貴子女將參與約30分鐘的小組面試,分別在音樂、人際、創意及學習能力等各方面作評估」

考完阿囡出到黎問佢考左乜,結果佢只係記得有考中、英文生字,仲話都唔係全部識晒。

家長面見

家長面見問既問題就好大路,基本上同各大forum寫既一樣:

  • 點解選擇音小?

    好似一開始咁講我聽左簡介會係真係幾鐘意間學校既,覺得音樂教育可以陶冶小朋友性情,小朋友純品d;又想培養小朋友欣賞藝術既興趣-學校長話齋做個有taste既人ma。另外我同老婆都相信學樂器訓練可以增強小朋友既耐性既。

  • 對學校有咩期望?

    呢個可謂又簡單又難度高 – 想小朋友每日都鐘意返學、開心放學,鐘意學野。學校能造就呢種學習精神就已經夠晒了!

  • 本身有無信主?對小朋友信教有咩意見?

    我諗好多家長都會諗佢地係咪真係prefer基督徒多d。我當時好坦白咁答佢我地無,我同太太都覺得小朋友選擇信仰係佢既自由,唔會迫佢信亦唔會迫佢唔好信。我什至講唔會因為佢讀左音小就要佢一定信主 – 諗返都唔知點解自己答得咁坦白。

見完後老師同我地祈左個禱就完左個家長面見。成個面見感覺亦同各大forum寫既一樣 – 佢講多過我講,似去左佈道會多過去面試。

面試結果

音小面試係咁多直私小學中算係Friendly (對比返18-19年熱門直私既面試次數) – 一take攪掂,又唔駛好似優才個收生咁多個steps。

面試後一個月既7月14日 – 收到email阿囡成功被音小取錄! 個心都當堂定好多!

6 Comments

  1. […] 雖然好多人當音小係”水泡”或者”面試熱身”,不過自己聽完同睇完其實幾鐘意間學校,所以最終都有幫阿囡報左名參加音小面試。 […]

  2. Antony Antony

    Hello, 小兒今年九月會升K2, 心儀左音小好耐, 請問佢面試難唔難呢? 要唔要求D勁PROFOLIO?
    小兒不是讀名幼, 自知未必係學之園果班的對手, 所以都冇諗住搵其他的直資小學, 但據聞音小係名幼小朋友的踏腳石所以諗住執下死雞。

    • 好校爸 好校爸

      Antony你好!難唔難其實我都唔知…因為阿囡都唔係好完整講得返發生左咩事,佢淨係同我講佢識唔晒d字。

      阿囡都唔係讀名幼,課外話動我地淨係有比佢學跳舞同彈琴(無考級無攞奬),稱唔上係強勁portfolio,不過好好彩當時學校收左佢。

      自己有少少覺得呢間學校又唔係真係只睇學生能力,睇返收左既同學仔我覺得大家都算係可以坐定定果種所謂「乖」既小朋友,唔知算唔算係佢地其中一個著眼點?

  3. Michelle Michelle

    請問你最後揀左音小註冊了嗎?

    • 好校爸 好校爸

      我交左第1次留位,不過後來因為真道收左,之後就寫左信取消左個學位。

  4. Chan Chan

發表回覆

你的電郵地址並不會被公開。 必要欄位標記為 *