[姐弟海外升學記] (十) 尋找新居的故事

移民其中最難忘既一幕,就係同香港個屋企講bye bye。畢竟香港人勞碌一世,都係想搵個竇啫。要放棄呢個充滿回憶既家,感覺始終難受不捨。

不過既然已經決定離開重新黎過,總要向前看。

我地比起好多移民既人幸運:老婆喺加拿大有屋企人,所以至少黎到已經有地方落腳,可以慢慢搵自己既理想新居,唔洗一早買定間屋,然後又發現間屋或者地區唔啱自己。畢竟我哋都係移民,人新路不熟,唔想越洋買一個自己未實地見過既屋企。

雖則搵一間新屋對我地黎講相對無咁大迫切性,不過我同老婆心目中,始終都希望喺加拿大可以好快搵一個屬於我地既安樂窩。


從來我同老婆既分工都好清晰:老婆睇野好實際,重實用性同抵唔抵;我睇野就比較表面:重外觀同埋感覺。

我記得我同老婆喺香港買既第一層樓,我同佢睇咗差不多30 – 40個單位。我地最後買果個單位,我會形容為係「一見鐘情」:

老婆:嘩!間屋無乜多餘裝修改動,廚房夠大放到好多野,夠實用!

我:嘩!間屋好新淨,感覺好簡約,我鐘意。

雖然我地重眼點唔太一樣,不過或者咁樣先好:因為大家會睇到對方唔會著意既野 (雖則……我著意既野通常都無乜用)。


黎咗加拿大5個月,我地好努力咁去睇屋。

我記得我喺加拿大第一間睇既屋,個廁所就係咁既:

俾著你睇到,你第一個反應會覺得點呢?我同老婆既反應係:

老婆:你有幾可會得閒係度浸?又嘥水。唔實用。

我:好靚呀…不過….個感覺好芬蘭浴好浮誇呀….所以都係唔好了。

呢間豪華氣派又如何?

老婆:果盞燈點抺呀?

我:可唔可以…唔好咁多樓梯?我睇到都感覺好攰。

對我黎講,喺度睇屋其實係學習多過睇;因為要留意既野同香港太不一樣了 (會開另一個post講)。隨住我地睇既屋越來越多,對呢度既屋認識越來越多,我地既要求開始越來越多。

我地到底想要乜?簡單地講:

老婆wish list(實用)
  • 雙車房;個車房仲要連住間屋,咁冬天就唔駛咁凍行出去上落車
  • 車房喺屋前面大路出,唔係喺去經過屋後面條泥地街出入
  • 主人房有廁所
  • 廚房有足夠儲物空間
  • 價錢相宜
  • 位置近兩姐弟學校
  • 唔好咁多花草樹木,有排攪
  • 前園唔好咁大或斜,難剪草
  • 鐘意地板唔鐘意地氈,易清潔,小朋友瞓地下玩唔會吸塵
我既wish list (感覺)
  • 新淨
  • 唔好古怪顏色 (e.g. 成間屋啲牆都係紅色),最好淨色
  • 唔好一入屋就有條樓梯,因為一開門就會好似碌落去 / 碌出去
  • 開放式廚房,咁先似去咗外國丫嘛
  • 價錢合理,最緊要感覺良好
  • 間屋唔好九曲十三彎,阿囡話佢驚蕩失路,我又驚搵極都搵唔到弟弟
  • 唔好咁多花草樹木,感覺好似去咗森林咁
  • 前園唔好咁大或斜,望落去怪怪
  • 鐘意地板唔鐘意地氈,因為地氈用到好舊就唔靚

當然大家都知道:當要求越來越多,搵到既機會就越少。我地既情況更加難,因為我地鎖定咗一個舊區去搵屋;呢區當時起既屋大部分都無主人房廁所、廚房同廳分開、全屋多數都係地氈、無車房連住間屋,仲要多數係單車房由屋後啲泥路出入。

另一個做法就花好多錢同時間,搵啱一間平既買咗佢拆咗成間再起;不過我地又下唔到呢個決心。因為錢同時間,我其實都無乜…..

我地越睇得多,越有啲失望,同時開始諗:我地係咪應該調整一下個要求呢?我地係咪應該取捨邊啲條件可以唔要呢?

然後開始冬天,落雪了。一般呢度既房屋巿場到咗聖誕就會放慢,因為聖誕係大節日,個個都會過節唔會呢個時間賣屋。我地都諗叠埋心水,諗住過埋個聖誕再算吧。

點知agent呢個時候忽然打黎話有個新盤,叫我地即日去睇。


我抱住無乜太大期望既心態,黎到agent想我地睇果間屋既門口。

一入門口,我個心態好快就開始改變。之前睇咗好多間屋,我基本一入門就已經唔鐘意:一係就對住條樓梯,一係就好窄;呢度一入屋好開揚,想像到一家四口衝入屋都仲有位企。

門口右手邊就係客廳,「四四正正」一目了然;小朋友係度跑來跑去、坐喺地下玩既畫面開始進入我既幻想。由客廳行過去廚房,一樣整齊企理,仲要係…….open kitchen呀!

沿住樓梯上去就係睡房。睡房每一間都四四方方簡單實用;黎到主人房…..有廁所呀喂!而且行哂成間屋,全部都係用地板,地板仲要好新淨……

我同老婆好似小朋友去咗玩具反斗城咁,喺間屋度興奮地行來行去。我地不停咁想搵下啲瑕玼,因為我地都有同一個想法:呢度係咪too good to be true呀?係咪有古惑㗎?

我地用咗好耐時間喺間屋度徘徊,搵唔到一個我地唔鐘意呢度既理由。

我:呢度咪符合哂你個checklist囉?

老婆:個感覺好好,好鐘意呀。

我諗…..我地終於搵到我地既dream house了。

真係踏破鐵鞋無覓處,得來好鬼費功夫。

喺度真係要讚下我地個agent,同我哋咗60幾間屋都仲好有耐性幫我哋留意。佢知道我地實會鐘意呢間屋,所以間屋一出就即刻帶我地睇,我地係第一個睇呢間屋既人。

我地把握機會,即日出咗offer俾個賣家。經過少少價錢討論後,好快就達成共識。

我地終於重新搵到一個屬於我地既家了!

喺異地重新開始,終於邁進咗重要既一步。

PS: 之後會開另一個series講下成個買屋過程。stay tuned!

3 Comments

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!