真道一年級迎新日3 – 曹校長:請家長望遠一點

去左第一次同埋第二次真道迎新日,黎到開學前最後一次迎新日。今次真係好入肉地講左成個半鐘關於9月返學既資料,一個post都寫唔晒。所以決定將今次分開4 part寫 -今次part 1講下校長分享,part 2講開學需知,part 3講校園生活,最後part 4介紹下聯課活動;希望對想認識多啲真道既人有深少少既介紹!

「踩單車你望住自己車頭個轆,你唔會平衡到。望遠啲」

曹校長7月去左澳洲,係佢探佢brother in law既時候有機會踩單車,同時令佢回憶返自己細個學踩單車既過程,想分享比家長聽佢既一個領悟。

原來曹校長細個係大圍沙地只係用左半個鐘就學識左踩單車。曹校長話當然佢係有少少天份(佢宜家都可以唔用手扶駄踩到直線),但更重要係當年一個租單車師傅既一句話:「你望住自己車頭個轆,你唔會平衡到。望遠啲」。

校長引申到我地同子女既關係:「如果你係好介懷你自己同埋你既小朋友係短期之內o唔ok,你係唔會平衡到,你係唔會ok。」

踩單車望得遠,你先可以平衡到架單車;望得遠小朋友既未來同懂得接受佢地短期既唔ok,你先可以平衡到自己同小朋友。

7 Habits of Highly Effective People -「以終為始」

曹校長跟住引用Stephen Covey7 Habits of Highly Effective People 其中一個同「望遠啲」呢個理念好相近既habit – 以終為始 (Begin with the end in mind)。

以終為始即係話做任何事先諗下最長遠你想達到咩結果先開始。學校希望同家長一齊努力,向學生最終既目標一齊進發。

如果家長望得太近 – 淨係掛住佢一、二年級成績好唔好,小朋友平衡唔到,因為家長自己都平衡唔到。校長不諱言小朋友既壓力或者痛苦,好多時其實係家長附上。所以校長希望每個家長緊記我地最終既目標,唔會因短暫目標而失去平衡。

校長笑住問咁呢個最終目標要有幾遠?讀完真道呢十一年?校長相信在座家長唔會滿足於咁短既目標 – 起碼都去到十五年升讀大學。

你希望小朋友既目標係會考滿分,定係成為一個all rounded既人?

校長希望係呢十五年之間,家長要好好想清楚呢個最終目標應該係乜野。

真道既目標係訓練小朋友靈、德、智、體、群、美;做到全人教育。如果家長只係在乎小朋友入唔入到IB,攞唔攞到43分,入唔入到中大:呢個只係智既表現,係咪就已經係我地想小朋友十五年後得到既野呢?如果係,小朋友未來又有幾all rounded呢?

後記

每一次聽曹校長訓勉,除左覺得好有意思之外,仲多多少少覺得當頭棒喝:要睇得遠,要有vision,一啲都唔容易。好彩既係每次聽佢講完,我同老婆都會覺得:阿囡真好彩入到呢間學校。

下回會講下真道既開學需知,等大家知道學校有咩措施幫幫呢一班新手小學雞適應!

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!