Skip to content

STEM究竟係乜野?

如果你同我一樣都有參加唔同直私小學既簡介會,我好肯定你一定會聽過d學校話自己係度推STEM(原意解樹幹)。究竟STEM係咩意思? 有咩用? 我嘗試綜合左好多唔同既講法同大家一齊參詳下。

STEM即係點解?

其實STEM本身係下面四個理科科目既縮寫:

  • S – Science (科學)
  • T – Technology (科技)
  • E – Engineering (工程)
  • M – Mathematics (數學)

每當近代教育界想推動多d科技人才教育既時候就會用呢個term黎慨括上面果4個科目。

數學同科學大家細個應該都有學過,咁科技同工程係乜?

工程科同科技都著重將科學理論實淺,考慮現實條件(錢、物料etc)用黎改善現有既程序或者系統。例如土木工程,你以前起屋自己一磈磈磚頭砌上去,但土木工程係講點樣用唔同工具令起屋呢件事安全又有效率。又例如wifi呢個科技以空氣電波傳送訊號,令你宜家係廁所都可以唔駛搭住條上網線就睇到我呢個post。

邊個發明STEM呢個term?

STEM呢個term最先出現係美國,當時係原於學界討論緊社會對擁有能推動高科技發展畢業生既需求。自從呢個term出現之後,各國都開始去研究點樣推動STEM教育同埋吸引科技人才;有d國家什至會將你有無修STEM科目作為考慮你申請移民既因素。

2016年,前任教育局局長吳克儉係政府教育工作小組提出呢個term,之後我地就開始陸續聽到唔同學校開始推行呢個理念 。

點解要學STEM?

既然我地一直都有得上數學同科學堂,點解攪左呢個STEM出黎? 做乜要學STEM?個問題係在於應用性同埋關連性

大家會唔會覺得細個學果d數學同科學已經比返晒阿sir? 其中一個問題係我地學過好多科學同數學理論,但我地應用佢地既地方只係係考試,而唔係解決一個問題。你可能知道「冷縮熱脹」呢個原理,但你未必諗過你鋪地板果陣要用呢個原理 – 鋪果陣留返d位,因為鋪得密一熱你個地板就飛起晒。

第二個問題係以前我地學數學同科學都係兩科好唔同既課目。你有你學數學方程,佢有佢背科學理論。自己係大學係讀工程科,就發現其實呢幾科基本上係唇齒相依。

一個好簡單既例子 – 沖水馬桶。想像下宜家未發明沖水馬桶,個個淨係得個啖罐;你要解決既問題係:點樣將我地d 便便有效又乾淨咁處理?你淨係識科學或者淨係識數學,未必解決到呢個問題。但係:

  • 你諗到要將啖罐入面既野自動沖走佢,沖走左d野要去到一個地方再處理掉
  • 用科學 – 你知道水壓既理論可以應用於沖水呢件事度
  • 用數學 – 你可以將水壓呢個科學埋論量化,計下要幾多水量先可以沖走一次d便便
  • 用工程 – 你知道點樣建構呢個沖水馬桶,點樣將d用黎沖水既水自動refill,點樣將儲左既水係沖果陣大力放出黎
  • 用科技 – 點樣可以整呢件事大規模咁做 – 唔係講起一個沖水馬桶,而係當全個屋苑,什至全香港都要用呢個系統,點樣有效地將你個設計scale up

所以STEM其實係著重我地小朋友學既時候同時運用呢幾科既知識去解難,而唔再係著重分開考4份卷攞滿分,呢4科唔係「攞你命3000」。

學習既過程會係比一個問題你,然後大家著手去搵答案解決呢個問題。唔會有標準答案,只係在意你解唔解到個問題。

STEM係咪等於學寫program / apps?

一講到STEM大家一定會諗起寫program。學校既demo亦都一定會係講小朋友點樣program d機械人去做野。不過其實唔單止係咁,學寫program只係學其中一種科技(programming language)同埋學羅輯思想(logical thinking),但係更重要既係能活用上面幾個科目既思維。

當然寫program或apps個好處係好容易比小朋友可以一次過又簡單咁學點樣用電子科技去解決一個問題。但apps唔會解決晒我地呢個世界上既所有問題ga ma,再者,到佢地長大左果陣仲有無apps呢樣野都好難講,係咪?

仲想知多d?

睇完都唔係好知我講乜?呢度搵到一條我覺得講得好簡單易明既動畫,有興趣想再了解多d不妨參考下:

如果想知間學校攪STEM攪成點大概係要知道佢地點樣將呢4科串通 – 更多於佢地學寫果個program有幾深。當然講係咁講…或者好難靠一個簡介會就了解一間學校攪STEM成唔成功。

所以係度想請有經驗既家長係度留言同大家分享一下!更加歡迎各路STEM專家出黎解解話!

呢D應該都啱你睇

幼兒STEM玩具:自製迷你吸塵機 估唔到我都有得寫下開箱文,不過唔係介紹潮流科技玩物,而係講下比阿囡玩既STEM玩具。 話說老婆...

Be First to Comment

發表回覆

你的電郵地址並不會被公開。 必要欄位標記為 *