早上九點三十分，我一如往常穿過一條窄巷行返埋自己個位。當初揀坐呢個位係因為通過條窄巷就直達公司後門，幾乎係無乜人會睇到你幾時返黎同幾時走。
「悄悄的我走了，正如我悄悄的來。」
我諗徐志摩應該無諗過佢首《再別康橋》教識我既，竟然係返工如何選擇座位。
同往常日子唔同既係：今日係我last day。一坐低諗住執下自己喺公司既個人物品，先發現除咗枱頭一張阿囡阿仔既相之外已經無乜好執。我諗呢個係長期work from home既副作用。
十一點係我地team既每週例會。除咗身在美國既老細同喺哥斯達尼加既兩位同事，我同其餘四個同事擠入一間喺正pantry出面既會議室。個人唔係太鐘意呢間房，因為次次開例會既時間都係睇住人地排隊去攞飯，令自己份外肚餓。
老細：「今日係X既last day。再一次多謝你呢三年既付出，亦特別要多謝你呢兩個星期咁努力同大家handover。」
加拿大(或者普遍北美)既notice period都好短，只有兩星期。曾經試過三個月notice period既我覺得好不可思議。不過我其實覺得短既notice period對公司對員工都好，畢竟長痛不如短痛。
老細：「我keep住有問大家對你離開既感受。因為你安排得好好，所以大家都好有信心接管你既工作，對你即將要離開好放心。當然，大家都好傷感就是了。」
竟然會有人讚我安排得好。我其實好想叫佢講多次等我錄起佢俾老婆聽。
「多謝大家呢3年以來對我既支持。呢份係我喺加拿大既第一份工，你地每次既指引、每次既幫助、每次既讚美對我黎講都係無比重要。」我feel到自己既語氣開始激動。
「當年Matt （老細）interview果陣問我想喺呢間公司achieve到啲咩。我當時答佢：我想work with cool people on cool things。我覺得我做到了。好榮幸可以到你地咁多個咁cool既同事共事合作，我相信呢條team會繼續stay cool、stay successful。」
會議完結，老細交帶話今日係我last day，任何新既request都唔駛理佢。我將少少手尾交代好，再send埋幾封同客戶告別既email，差不多已經無乜野好做。
不經不覺磨到下午三點，我決定交返部電腦俾IT正式收爐。
接收我電腦既就係當年俾部電腦我既IT同事。當年由於COVID公司無開門，我係去佢屋企攞呢部公司電腦。IT同事都記得呢一幕，不經意地講咗一句：「咁就三年了」。
咁就三年了。
回想起兩年前第一次返office，係公司攪既stampede breakfast。當時見到一枱枱有講有笑既年青同事，我覺得自己好似一個插班生，而且仲要係一個讀開本地學校、但忽然要轉讀國際學校既超齡插班生。
當日「站著如嘍囉」既插班生，唔知今日算唔算係幼稚園「畢業」。不過當我開始離開office同每一位同事道別，個感覺好似畢業一樣：每個同事都同我握手擁抱送上祝福，然後同我講：We will miss you。
由當初既格格不入到今日既依依不捨，我諗應該係我呢三年喺加拿大工作最大既得著。
感激有緣同一班好老闆好同事走過呢一段對我黎講相當陌生既人生旅程。
I will miss you all!
