黎到東京，點都要去下Harry Potter影城朝下聖。
沿路上見好多日本既年輕人都著住故事中既校服再拎住支魔法杖入場，令我覺得似去咗cosplay大會。
同呢班忠實fans相映成趣，今次同行既一位日本朋友竟然係完全無睇過Harry Potter，純粹黎陪我地。
我地諗咗好耐點樣用一句最簡單英文解釋咩係Harry Potter。
「A boy learns magic at school and later kills the bad guy with magic」。
我淨係諗到咁講。
比起一般主題公園由得你自己亂行，Harry Potter影城比較似一個guided tour – 基本上我地係順住佢個館既設計去參觀。
館內主要係展示Harry Potter系列電影既各個拍攝場地（e.g. 學校大飯堂、9又3/4月台、魔法部、斜角巷 ) 同道具 (e.g. 服裝、各魔法杖)，唔會有機動遊戲。不過館內都有啲大家可以參與既互動遊戲，例如你可以喺個green screen面前坐喺個掃把度扮飛，前面既Camera會將你key返落電影既飛行畫面。
弟弟唔知點解當咗個掃把係隻馬咁不停上下「印」，連幫佢拍攝既姐姐都忍唔住笑。
我覺得最有趣既係一個Quidditch (魁地奇）既遊戲。工作人員將我地分成兩組，然後跟佢指示做出各種表情 – 歡呼、喝倒采、扮驚。電腦會即時將我地啲表情key返落原本Harry Potter電影Quidditch既片段入面，再俾我地download返。
令我難忘既係負責帶領我地做表情既工作人員姐姐。佢七情上面，感覺佢比我地更加興奮，令我地都被佢感染，落力去參與遊戲。最難係佢呢個興奮既狀態唔係淨係做十分鐘 – 因為我地呢一班人玩完，後面第二班又來了。
我覺得我感受到啲工作人員既認真同投入，亦都係我更加享受今次遊園既原因。
我地朝早大約12:00黎到，玩到差不多4:00，最後黎到近出口既gift shop。
心諗今次會大出血了，我同阿囡講話你見到咩鐘意既就買啦，畢竟我地應該好耐都唔會再黎。我覺得自己既口吻好似當年我去婚禮展遇到果啲sales：「一生人一次咋，唔係唔買下話！」
我見到有一排魔法杖，諗住買支返去日日「媽lee媽lee home」，點知反而係阿囡同我講：「唔好買啦，無乜幾可會拎出黎用喇」。
結果我地咩都無買就離開咗。
喺我覺得有少少可惜之餘，我越來越覺得….阿囡似我阿媽多過我似係佢老豆。
誠意推介俾Harry Potter既fans或影迷去遊玩。
有興趣既朋友可以去睇下：
地址： Warner Bros. Studio Tour Tokyo, 1-1-7 Kasugacho, Nerima Ward, 179-0074 Tokyo
交通：
- 搭乘「東京都營地鐵」的「大江戶」線，到「豊島園站」下車，再步行約 5 分鐘
- 搭乘「西武電鐵」的「西武豊島」線，到「豊島園站」下車，再步行約 5 分鐘
門票：
- 成人票（18 歲以上）：6,500 yen
- 學生票（12-17 歲）：5,400 yen
- 兒童票（4-11 歲）：3,900 yen
