今次亞洲之行先由Calgary搭飛機落溫哥華，再轉機去東京同家人滙合玩幾日，然後再返香港。
我其實好怕坐長途機，因為每次無論我幾攰，我都一定係全程瞓唔到，好似小學生第日去學校旅行緊張得滯瞓唔著咁。
宜家比較慶幸既係至少兩姐弟已經大咗好多，唔駛又驚佢嘔奶又驚佢要換片又驚佢成程機爆喊。基本上有個in flight entertainment佢地就可以自娛一番。
上到飛機打開in flight entertainment，啲戲一係睇過一係無乜興趣。還好我都準備咗幾本書喺Kindle，呢程長途機正好俾我還下書債。弟弟就好明顯副放假engine已經撻著咗，津津有味地不停咁開啲小遊戲出黎不停咁襟。
搭咗幾個鐘，到咗飛機餐時間。從來對飛機餐都無乜期待，我仲記得以前喺航空公司做intern識咗另一個做catering既intern，話佢間唔時都要去試食。大家聽到後既反應都係：嘩，辛苦哂。
但一搭長途機，我就有啲期待飛機餐。唔係因為佢好食，而係我覺得食完之後，距離目的地既時間好似就會自動縮短咗。
今次飛機餐既選擇係腸仔奄列同埋雞肉炒麵。我滿以為揀啲簡單啲既野會穩陣啲，點知食咗一啖無蛋味同無蛋質感既蛋就知道自己又再一次喺呢個選擇題中答錯。
又捱過咗幾個鐘，我已經睇完咗一本我以為足夠我睇到返加拿大既書。我合埋雙眼，諗住應該差不多夠攰瞓得著了。點知機艙既燈慢慢亮起，原來我地已差不多到日本。
經過十個鐘既航行，我地到咗東京成田機場。相隔十幾個鐘再腳踏實地既感覺真係好好，不過我地旅程其實仲未完結。我地住喺上野，拎住8件行李既我地去到京成電鐵站，登上呢個長途旅途最後一程車。我諗我既失眠症應該只限於喺飛機上，因為一上火車，一家大細包括我都好快瞓著。
晚上大約七點，我地終於去到目的地既上野站，親友已經在閘外等待。
睇到弟弟衝出閘外飛奔去嫲嫲度擁抱既畫面，感覺張機票已值回票價。
由地鐵站行出街上，一陣大風迎面而來。宜家既東京大約係六、七度左右吧。俾著以前我可能已經凍到縮埋一舊，但諗起自己經過零下幾十度冬天既洗禮，忽然覺得自己強壯咗唔怕凍：零上六、七度？濕濕碎啦。
返到酒店，經過超過二十個鐘既長途跋涉，大家既電量差不多用完了。再一次覺得返黎一個月係啱既，唔係點對得住呢二十幾個鐘既travel？
家姐：知唔知咩係「平面瞓覺」？
我：咩係平面瞓覺？
家姐：即係宜家你俾任何一塊平面我，我都可以喺上面瞓得著。
喺驚覺佢講野好似我既同時，我發覺連已經呼呼大睡既佢既睡相，都同我瞓著咗既衰樣慢慢重叠起黎。
