老細每年只會由美國返黎Calgary兩次左右，而且每次返黎都好忙。我留咗個message俾佢話想同佢傾15分鐘野，結果等咗一個鐘，老細先開完會埋黎話可以meet。
我地入咗一間房仔，房入面有兩排對住既長凳，中間隔住一個小茶几。有別於其他meeting room，呢間房又無枱又無窗，感覺好似去咗一間K房。
「OK……」我抖一啖大氣，然後同老細講：「我有個news想話你知。」
老細表情驟變。喺呢個氣氛下，任何人都知道呢間K房下隻歌係「好心分手」。
我：「我有一個job offer，所以我打算辭職。」
老細：「講多少少你個offer俾我知可以嗎？」
我將offer既內容同埋我想走既理由一五一十講咗俾老細知。
老細耐心聽完之後，用好誠懇既語氣同我講：「雖然我好想你留低，但我覺得你應該出去試下。新工聽落係一個好既機會，而且又照顧到你家庭既需要可以remote work。」
老細停頓咗一下，然後問我：「不過……我點都要問下你：你覺得有無啲咩我地可以做而令你選擇留低？」
我覺得自己去意已決，所以我輕輕搖一搖頭：「好感謝你，不過我希望出去試下新既環境。」
「我明白了。我真心替你高興呀！不過，如果果邊萬一唔work out，我可以安排你返黎。所以記得keep in touch。」
我知道老細所言非虛，因為之前有另一個同事都係走咗幾個月之後返咗黎。忽然好有去Costco買野既感覺：如果唔啱，仲有得退。
最後，老細語重心長地同我講：「你記得要俾多啲自信你自己。我相信你應該唔駛我話俾你知你既長處係咩，唔好太低估你自己呀」。
移民後果種患得患失既心情，老細可能看在眼裡吧。
我：「記住你再返Calgary果時話我知，我一定會黎見你。」
「當然了！我實會搵你catchup。」老細用佢既招牌笑容回應。
今次應該係我作為呢間公司既員工最後一次同老細見面了。我有少少唔敢正眼望佢，因為我喺呢啲時候係特別眼淺。我激動地同佢握一握手，然後大家擁抱咗一下 。
喺憧憬新環境既同時，我知道我將會幾唔捨得呢位又風趣又易話為、我喺加拿大既第一位老細。
