我以前都講過，其實移民後生活轉變得最多既，係我老婆。
曾經喺香港工作上好出色既佢，黎到加拿大為咗照顧我地一家大細變成full time mom。一年過去了，當我地開始適應Calgary既節奏，老婆亦開始面對可能好多媽媽都會面對既問題：
「到底應該繼續專心留喺屋企？定係時候出去做返野呢？」
對於老婆黎講，就呢一刻而言，小朋友依然好依賴自己，特別係弟弟。但當佢地開始大，慢慢有自己既空間，咁自己到時做乜好？特別係喺加拿大，如果再等幾年，到時仲可以重返職場嗎？
相反地，如果宜家出返黎做野，除咗錯過咗陪伴小朋友既黃金時間，仲有另一堆問題：如果做返本行，肯定會忙好多，壓力亦會大好多；求其搵份好relax既工，人工又未必足夠可以幫到屋企，咁仲值唔值得？
再者，喺新環境搵工，好可能要由低做起。做開管理層既自己，心態上點適應？自己仲可唔可以重新爬返上去以前既位置？
我覺得以上一堆問題某程度上同「移唔移民好呢」一樣令人糾結：因為既牽涉自己既人生目標，但又同時影響一個家庭既集體利益同未來。而更困難既係：揀咗其中一條路，感覺就好難行返去另一條路。
所以老婆喺呢個問題上亦展現出少有既猶豫不決：有時會積極搵下工、寄下信；有時又打消出去做野既念頭。每次報咗份工無反應，心入面充斥又失望又鬆一口氣既矛盾，因為心底裏仍然遊走於做定唔做好之間。
不過喺呢個過程中，出現咗一個轉捩點。
弟弟既學校想搵義工幫手；老婆覺得一來可以回饋學校同老師，二來可以多啲了解下弟弟既校園生活，於是報名參加。
老婆開始咗做學校義工之後，老師們都非常欣賞佢。因為老婆做野好快手，而且老婆以前其實曾經喺日本教過書，有教學經驗，所以基本上老師唔駛講佢都知道點樣幫到佢地。
漸漸地，老婆對喺學校工作越來越純熟，亦可能因為學校義工既經驗令佢重拾返當年做老師既感覺，佢亦越來越喜歡返學校幫手。
於是佢諗：何不以學校作為一條新跑道重新開始？
原來呢度既學校會請一啲part time既assistant幫手處理學校雜務。人工並不算高，但勝在夠flexible。
於是，老婆開始咗做學校part time assistant既日子。呢份part time既職責基本上係替補一啲要放假既全職assistant，所以老婆需要每日去唔同既學校幫手，亦因此有機會近距離接觸到唔同學校既學生，了解多咗唔同學校既運作。
雖然每日都要去適應唔同學校既routine，又要應對不同年級嘅學生，不過老婆適應能力好好，總係能夠滿足到每間學校既要求。
有一日，其中一間佢只係做過幾次既學校既校長同佢講：「我地宜家想請一個全職assistant。如果你願意做，我唔駛你apply就即刻俾offer你。」
原來不經不覺間，老婆既表現已經看在老師同校長既眼裏，一個新既機會亦由此誕生。
就係咁，老婆喺新環境下搵到第一份全職既工作：一份雖然不再身居高位，但令佢能得到滿足感同意義既工作。同時工作上既彈性亦令佢可以同時兼顧陪伴兩姐弟成長既時間。
唔知道睇緊呢篇野既你，係咪掙扎於working vs full time mom既決定，又或者糾結於移民後重投工作巿場。希望老婆呢個故事，俾到你少少鼓舞。
最後，除咗多謝老婆既付出，當然仲要讚下老婆：由公司管理層轉變成學校assistant，心態轉換並不容易，而咁快就令人認同佢既能力俾機會佢更非易事。
我相信可能係佢呢種隨遇而安、能屈能伸既性格，先推動到我呢個本來打死都離不開comfort zone既人，由零上三十度既香港搬咗黎零下三十度既加拿大吧。
