[姐弟海外升學記] (三十七) 犯人是……?

阿囡有一堂以crime investigation為主題既科學堂。每堂老師都會講啲唔同既查案技巧,好似今日阿囡就學點樣用指模去搵犯人。

老師話宜家佢代表一間公司請哂成班同學做偵探;公司發現佢地個夾萬俾人打開咗,入面既錢不翼而飛。宜家有5個疑犯:

  1. 公司主席:最近投資失利,喺出面爭人一大筆錢,急需錢黎週轉。
  2. 公司會計:同主席因公司最近投資問題產生不和。
  3. 公司工人:早前工傷但得唔到賠償,對公司懷恨在心。
  4. 公司副主席:一直處心積慮想趕走現任主席,自己霸佔公司。
  5. 公司秘書:時常埋怨公司人工太低,唔夠佢買衫。

老師派咗5個疑犯既指模俾同學,俾佢地同喺夾萬上套取既指模比較。經過一輪查証,大部分同學發現:原來夾萬上既指模係屬於公司會計。

老師:「好啦,咁宜家大家搵到邊個喺犯人嗎?」

同學A:(信心樣)「係個會計!我地對到個指模係一樣。」

老師:「好。咁你呢?」

同學B:(附和樣)「應該係個會計,我地都對到個指模係一樣。」

正當大部分同學都確定已經水落石出既時候,有一位同學舉手。

老師:「你有咩發現?」

同學C:「我覺得我地應該唔知道係邊個做既。」

老師:「點解?你唔係搵到會計既指模咩?」

同學C:「我地係搵到會計既指模,不過佢係會計,佢有掂過個夾萬應該好正常啊。所以我覺得我地其實無足夠証據証明係個會計偷咗啲錢。」

老師微笑點頭,然後同全班同學講:「無錯喇!佢講得好啱,我地基本上係唔夠証據証實係個會計偷咗啲錢。所以除咗呢位同學,你地全班都俾我咗炒魷魚喇。」

細個果時讀科學,我地好多時都係集中喺學習個知識,好似阿囡呢一堂咁,大家集中去學點用指模去搵犯人。不過,讀科學真正最有趣又最有用既地方,其實係學習科學既精神:如何有邏輯地、批判性地思考。

我諗老師呢一課真正想教學生既,可能係「不要只學了知識,而忘了思考」吧。

Leave a Reply

想睇到最新內容?

歡迎讚好「好校爸」Facebook專頁!