話說阿囡有個project，老師俾咗個劇本叫佢地幾個同學一組，好似拍戲咁拍返個故仔出黎。
由於呢度既老師唔會好似香港咁俾張工作紙你話你知要做啲咩，所以幾個小朋友一路做一路遇到好多問題：唔知點拍、唔識用電腦抄返條片出黎同剪接等等等等。但佢地遇到最有趣既問題係呢個：劇本有一幕要同學A抱起同學B，但佢地拍既時候發現：同學A唔夠力抱起同學B。
點算好？
佢地幾個同學一齊brainstorm，結果諗咗以下既方法：
佢地記得老師有個假髮 (Halloween玩果啲)，於是佢地問老師借，然後由組內最輕既同學C戴住個假髮扮同學B。
同學A抱起同學C時，無出鏡既同學B就喺Camera側邊讀對白。
間唔中都有家長問我：加拿大返學咁free又無功課 ，小朋友學唔學到野㗎？
就以上呢個project，學校無教佢地如何拍一條片、無教佢地如何剪接、更加無教佢地如何加入音效。所以某程度上，你可以話學校無教到佢地任何野。
但佢地靠自己學咗點樣由唔識拍野到識得合作整一條片出黎。
佢地學咗既其實只有一樣野：當有一個你未遇過既問題出現果時，你點去處理 – 好似佢地一齊去solve同學A抱唔起同學B既問題咁。
記得讀大學果陣同啲同學通完頂喺大學站等火車，大家喺個月台度歎息唔知做餐死學呢啲野黎做乜。當時其中一個同學忽然語重心長咁話：「我地黎返學，唔係淨係學學校教既野；我地係黎學點樣去學一樣你本來唔識既野。」
我果下覺得呢個同學個頭頂好似多咗個光環。
雖然到咗第二日，我都係如常咁抄我呢個同學功課，但我永遠都記得佢講既呢番說話。
如果你都好似我一樣相信「上學是學習如何學習」(learn how to learn)，咁我諗你都會相信喺加拿大讀書，多野學到你個小朋友學唔哂。
