[姐弟海外升學記] (三十八) 太空人的故事

今日想講一個太空人既故事。

唔係移民後兩地奔波果種太空人,係坐穿梭機上太空既真太空人。

呢個太空人叫做Chris Hadfield。Chris係加拿大人,1992年加入加拿大太空局 (CSA),1995年第一次上太空。佢職業生涯中上過三次太空,最後一次更加成為國際太空站(ISS) 既總指揮。

Chris最廣為人知既事蹟,就係喺國際太空站度自彈自唱David Bowie既”Space Oddity”,仲拍咗個MV放上Youtube。呢個首次喺太空度拍既MV,至今喺Youtube吸引咗超過5千萬次觀看。

係佢既自傳《An Astronaut’s Guide to Life on Earth》,Chris紀錄咗由佢9歲開始夢想做太空人到佢完成最後一次太空任務既種種難忘經歷,同時分享佢作為一個太空人,對工作、生活以致生命既深刻體會。

書中其中一個章節講述Chris對於面對新環境既感受同領會。Chris憶述佢第一次到達國際太空站,真正感受到自己一直所認識既世界徹底顛覆 – 所有物件,包括佢本人,都脫離地心引力隨處飄浮。儘管佢喺地球進行過無數無重狀態模擬訓練,但當真正去到太空呢個熟悉又陌生既新環境,依然令佢感受到一種前所未有既「cultural shock」。

要克服呢個名符其實「翻天覆地」既轉變,Chris準備咗一個to-do list俾自己,然後將自己既精神都集中於to-do list上既事項。佢既to-do list並非「我要完成太空任務xyz」咁宏大,而係一啲簡單、瑣碎既事情,例如「我要將太空手套放好」、「我要將同行太空人既用品放到收集箱」。當Chris按to-do list完成每件小事、獲得各項「小成功」,佢發現自己慢慢喺新環境下建立到自信,忘記種種突如其來既迷失。

偶爾都聽到人講移咗民後好迷失、有好大無力感。用Chris既說法,可能只係當我地啱啱踏入「無重狀態」 – 又未熟路、又未識人之時,太在意各種現實同期望之間既落差,將精神都放喺呢個問題上:

「點解我一向都做到既野宜家一樣都做唔到?」

或者轉換心情,好似Chris一樣集中將每件小事做好,腳踏實地既感覺就會逐少逐少地復甦。

祝福大家新一年喺瞬息萬變既環境下,依然能夠企穩陣腳,慢慢步向心目中既理想鄉。

與正面臨種種人生重大轉變既你共勉。

Leave a Reply

想睇到最新內容?

歡迎讚好「好校爸」Facebook專頁!