今次去溫哥華講到明係輕鬆玩，所以老婆一改以往行程緊密既作風，全程只係plan咗一兩個地方：Stanley Park、水族館同Science World (科學館)，其餘時間全部用黎hea同食。
5日4夜既行程入面我地食咗好多樣野：日式居酒屋、日式拉麵、港式燒味、漁人碼頭美食、韓式料理，仲有各式快餐小食同甜品等等。
但令我最難忘既，係溫哥華既中餐。
我地喺朋友介紹下去到華人區Richmond一間小廚食早餐。
我地叫咗一窩艇仔粥，一個牛脷酥同一碟干炒牛河。
牛脷酥無我想像咁甜，新鮮食個皮仲好脆，兩姐弟食完一舊好快又再encore。弟弟問牛脷酥其實係咩黎，我望下個餐牌，發覺原來牛脷酥既英文係Chinese sweet donuts。見佢地食到咁高興，我索性只係將呢個英文翻譯解釋咗就算，因為我估只要我一講咩係「牛脷」，兩姐弟應該會即刻放返低。
艇仔粥一窩好足料同份量，我地兩大兩小總共食咗10碗都仲有剩。艇仔粥俾我有一種特別既回憶，因為我第一次出街食粥，就係細個果時嫲嫲帶我去食艇仔粥。一路食，當時同嫲嫲一齊食粥既場景同時立體地喺我心入面重建起黎。
枱上啲野食都未食完，我地一家四口已經有共識要再叫多咗碟牛脷酥，心諗食唔哂打包陣間再食都好。
我倒係無諗過自己竟然係會為咗食到一個牛脷酥而滿足成咁。
入夜，我地約咗轉眼已移民咗去溫哥華一年既朋友食晚飯。朋友問我地想食乜野，我同老婆諗咗一輪，都係答佢不如食中餐。
朋友提議去返我地食早餐果間小廚食晚飯，因為晚巿各樣小炒都值得一試。於是我地兩日內第二次再度幫襯呢間食肆。
朋友都算係呢間鋪頭既常客，問咗我地有乜想食之後，好快就同伙計落好單。我地叫咗好多味久違了既港式小炒：豉椒炒蜆、薑蔥蠔煲、炸子雞、咕嚕肉等等。
朋友仲推介咗我地試下呢度既胡椒豬肚湯：湯既胡椒味並非太重，比起我以往飲既黎得無咁辛辣。我唔知點為之正宗，不過對好怕辣味既我就啱啱好。朋友非常客氣，結果俾我飲哂成大碗。
我自問唔係咩食家，你見我幾乎無寫過任何食評就知道。我唔識分析呢間小廚既食物有幾多粒星星，但呢一餐中式晚飯，係我黎咗加拿大以來其中最令我回味既一餐。
因為中餐最好食既時候，就係同親友好友可以圍住張圓枱，大家一邊閒話家常互訴近況、一邊品嘗風味佳餚既時候。
而令我今次呢一餐中餐份外美味既原因，係能夠喺異國下同舊友重聚、分享大家喺彼邦生活先能明白既感受。
呢一種「他鄉遇故知」既特別調味，對於我地呢類離鄉之人，永遠不會嫌淡。
(待續)
