Calgary既四季真係好分明。
任何時候，我都可以好清楚話你知宜家係咩季節。因為我既日常活動會自動提醒我。
剪草果陣係夏天。
鏟雪果陣係冬天。
執樹葉果陣係秋天。
如果奧運三項鐵人係比賽剪草、執樹葉再加鏟雪的話，加拿大應該會攞金牌。
未黎加拿大之前，我成日幻想呢度秋天果時遍地紅葉既景色。我以為成個加拿大都係楓樹。黎咗加拿大之後先發覺原來加拿大啲樹有好多種類，而喺秋天果時更加能突顯出樹既差異。
因為唔同既樹有唔同既葉，亦同時決定咗你有幾多樹葉要執。例如如果你門口果棵係松樹，基本上係無乜葉執。
我門口果棵係樺樹。宜家踏入深秋，每星期我都可以執到一大個垃圾桶滿既落葉。執完又落，落完又執。
人地律師喺office執業，我就喺front yard同back yard執葉，名符其實「work from home」。我唯一既優勢，就係律師執業唔可以靠吹，我執葉係可以literally吹。因為除咗用個耙耙埋啲樹葉，我仲可以用個吹風機吹埋啲葉，唔駛下下用個耙咁出力。
所以喺加拿大，我終於真正體會到咩係「狂風掃落葉」- 唔用啲狂風吹下，點掃埋啲落葉？
初初黎到加拿大既時候，見到呢度四時分明既景色覺得好驚歎。
「嘩你睇下呢度啲落葉好多顏色幾靚。」
「噢你睇下出面初雪喇！又可以砌雪人喇！」
但隨時間過去、經驗累積，所有新鮮事都會慢慢變成習慣。所謂「英雄見慣亦常人」。落葉落雪見慣了，眼前景色既wonderful忽然變成了practical。
宜家每次喺人地屋企門口行過，腦入面諗既反而係：
「嘩佢呢間屋個front yard細細地幾好喎，唔駛剪咁多草。」
「咦佢呢間屋前面棵松樹幾好喎，唔駛執咁多樹葉。」
「噢佢呢個屋淨係要鏟sidewalk啲雪，鏟少好多雪喎。」
所以有時聽到人話移咗民幾個月覺得唔習慣，我反而覺得：其實唔駛咁急習慣呀。去一個全新國度生活既新鮮刺激感，或者先係移民最引人入勝既地方。
能停留欣賞眼前種種wonderful，不也是很好嗎？
當你見到遍地落葉，心入面諗起「加拿大景色真美」，總比「幣傢伙聽日倒垃圾但未執啲葉」來得浪漫、美麗得多。
