以前喺香港可能一年都會出兩次門去下旅行。畢竟喺香港收入高啲，感覺就算去旅行洗咗一筆都可以搵得返，好似李白首詩話齋：「千金散盡還復來」嘛。
但黎到加拿大收入銳減又重税，而且因為工作上既人脈歸零，萬一無咗份工搵唔返，恐怕將會變成「強積金散盡不復還」。所以黎咗加拿大差不多三年，我地都無試過好似以前喺香港咁搭飛機外出旅行。
隨住COVID疫情退卻，工作又穩定咗少少，想去旅行既心又蠢蠢欲動。
以前喺香港去親旅行，一定要搵一個有勁多景點勁多野玩既地方，然後將行程遍排到密密麻麻仲忙過返工。
因為對香港打工仔黎講，返工係落地獄，放假係難得既死裏復活。返工你唔盡力，你最多都係對老闆唔住；但去旅行你唔盡力， 你係對自己唔住。
再者，要成功旅行，你必需要使用呢個世界上最難使用既野 – annual leave。你諗下世界上有啲咩係明明屬於你，但每次既用量都有限制、要夾公眾假期、仲要同人地夾好先可以用？
所以咁難得請咗假，點可以唔玩盡佢？
黎到加拿大，大部分我認識既人都無呢種放假要搏老命玩既諗法，更加唔會搵一個要有幾十樣野做既地方去旅行。
放假對加拿大人黎講係一個真正relax既時間。每次我問呢度啲同事放假做咩，好多時個答案都係：「nothing , just relax」。有人會去camp望住座山或者個湖幾日；又有人會去墨西哥book間all exclusive既酒店，日日飲飲食食同瞓覺就已經足夠。
對佢地黎講，放假唔係為咗去做啲咩，而係為咗咩都唔做。
作為我地黎到加拿大之後第一次大鄉里出城，我地選擇去距離Calgary只有大約個零鐘頭飛機既溫哥華。我地唔駛趕景點，只要輕輕鬆鬆慢遊呢個我諗係最多華人聚居既加拿大城巿就好了。
一大清早，我地一家四口黎到溫哥華機場。唔知點解一落機，就自動覺得肚餓。可能黎之前聽得太多人同我講話溫哥華好多好野食，我個肚腩向我發出訊息：「主人，我已經準備好了」。
（待續）
