今次見工總共有3 round。見完第一round HR之後，好快就安排第二round見hiring manager同佢上司。
自我介紹完之後，兩位interviewer就輪流向我發問。首先佢地問咗幾條what if既問題：
「又如果宜家只係俾一半時間你，你又會點做？」
好想答佢如果只俾一半時間我，我要做既野梗係去搵第二份工喇。不過我忍住咗。
跟住佢地問咗我經典見工題目：「你有咩長處同缺點？」
每次遇到呢條問題，我都會試下答一啲好似優點既缺點，又或者係一啲我有辦法改善既缺點。例如我有「好大食」呢個缺點，但係我因此唔會浪費食物，咁聽落咪又好似係一個優點囉。
最後，佢地問咗一條我喺加拿大見工成日俾人問既問題：「你預計自己五年後會係點？」
五年後既自己會點…..? 我諗都係膽固醇、血壓、尿酸過高之類啦。
我其實好好奇到底問呢條問題既人想聽到一個咩答案 (有無HR界既朋友可以指點下)。你其實係咪想問我五年後想升到去邊個位？不過總覺得空談自己五年後想去到咩位置幾乎就只係「我的志願」既成人版，感覺好空泛。
所以我選擇咗講我想呢5年獲得啲咩技能同經驗，感覺好似實在啲。
面試結束，從兩位interviewer既反應覺得自己算答得唔錯。果然，上午見完工，下午就收到HR通知話我順利進入第3 round，要做case study。
Case study既形式係佢會俾一個brief你，內容同你見果份工既工作內容一樣。你會有幾日時間做一個presentation講解自己會點處理佢俾既問題，然後present一次俾interviewer聽。
到咗present當日，佢地大約俾咗20分鐘左右時間我present，之後就直接Q & A。我覺得case study既重點其實唔係好似細個喺香港考試咁要「答中哂啲題目」。相反，我覺得interviewer真正想睇到既係你既thought process。
其實呢度既人interview果陣問親都係問啲好open end、無固定答案既問題。無人會問你1 + 1等於乜野，但佢地會問你會點樣去計1 + 1呢條數，同埋更重要係點解。
我覺得呢個同佢地既culture同教育有少少關係吧：比起想知你識啲咩，佢更在乎你點諗野。唔識既可以學，但識得點學更重要，因為知識係會永遠推陳出新。
3 round既面試用咗兩個星期完成。我諗我可以用當年William Hung紅極一時果句：「I already gave my best, and I have no regrets at all」去總結。
再來就等命運安排吧。
