如果要用一隻歌形容Calgary暫時既冬天，我諗應該係張學友既「這個冬天不太冷」。記憶中只落咗兩場大少少既雪，溫度又keep住零上，就連喺度大既老細都話好耐未試過。
尋日係廿四節氣既小寒，Calgary既天氣亦開始「重入正軌」。尋晚同今日開始落雪之餘，下星期氣溫仲會跌到去最凍零下30度。
如果你無黎過又或者啱啱先黎到Calgary，可能會有以下既問題：
問：我係咪一出室外就會結冰？
答：我記得以前睇過有套戲叫做「明日之後」講世界未日。有個畫面係個主角一路行，後面啲路係追住佢咁即刻結冰，驚險萬分…..
呢度係唔會咁既。
不過認真地講，一出室外一定要包住全身，包括你對手同個頭。如果身體直接接觸低溫，你可能會凍傷。
問：出面仲凍過雪櫃，放雪櫃啲野食出室外會點㗎？
答：會俾人攞咗。
問：打多啲邊爐有幫助嗎？
答：打多啲邊爐或者對你保溫有幫助，但對你體重係無乜幫助。
問：太凍可唔可以唔返工/返學？
答：我諗太懶先可以唔返工/返學吧。
認真地講，呢度就算零下二十度啲人都會照返工返學，除非落雪造成路面情況難以控制。阿仔學校基本上係話除非凍過零下二十度，否則小息係會照出去玩。
問：落完雪要鏟邊度？
答：主要係你間屋出面既行人路(sidewalk)，同埋要鏟條路等人地行到去你間屋門口 (e.g. 俾郵差行）。如果你前面有driveway你都會鏟，因為你唔鏟人地行唔到之餘，你一出車踩實咗啲雪你之後仲難鏟。
當然，仲有鏟你未起身既小朋友。
上面既好多都係講下笑，不過有一樣野想認真地講。
遇上咁凍既天氣，就算我身邊好多喺度長大既外國人都一樣頂唔順。每次大家圍埋傾計，大家都係提高八度咁講「this weather is insane」、「our winter is brutal」，從來都唔會有人好似Elsa咁同你講「the cold never bother me anyway」。
千祈唔好因為覺得唔習慣、覺得怕凍，就覺得自己好無用、好有問題，又或者立即下結論自己唔適合呢度。
畢竟…即使唔怕凍如Elsa，其實佢喺室外唱完成隻4分鐘既Let it go之後，佢都係即刻閂埋度門返入室內啦 (唔信你去睇個MV ）。
唔通佢喺入面開暖氣又話你知咩。
