[姐弟海外升學記] (四十七) ice hockey

Ice hockey可以話係加拿大既國粹,不過黎咗加拿大兩年都未入場睇過。適逢development league既球隊Calgary Wranglers舉行Kids Day有平飛賣,我決定同弟弟一齊入場體驗下。


賽事下午1點開始,12點半去到球場已經熱鬧非常。入場時職員姐姐送咗件主場球隊Tee俾弟弟,令弟弟立即變成主隊小球迷。

小食店前排滿準備購買各樣零食、汽水同啤酒既大小朋友。現場有少少攤位遊戲,仲有人幫小朋友畫上主隊logo既face painting。

我諗狂歡開party先係黎現場睇波既重點吧?


同弟弟搵到我地個位坐低一陣,比賽就開始了。

Ice hockey既比賽節奏好快,攻守互換只係發生於彈指之間。我係第一次去現場睇波而全程都睇唔到個波既。

Ice hockey亦令我重新認識「犯規」既意義。

我係打開籃球既,一般籃球比賽中你打人手或者阻擋人地前進就已經係犯規。但ice hockey犯規既尺度完全係另一個層次:推撞對方係基本動作,每隔三十秒就會見到有球員全速咁撞對手埋去個護屏度,好似佢要趕住迫入最後一班地鐵咁。

我一路睇,一路諗:「幾時拎支士巴拿出黎?」


因為係Kids Day,比賽中經常有Mascot喺歡眾席出現。弟弟每次見到d Mascot行過就好似fans見到偶像,想行埋去又有少少唔敢同少少怕醜,可愛極了。

我又發現呢度既小球迷一啲都唔比大球迷遜色:唔駛大人提醒,現場既小朋友自動自覺全場不停為主隊打氣、叫口號、甚至帶頭做人浪。每次主隊入波,現場震耳欲聾既歡呼聲絕非喺屋企睇波所能比擬。

因為現場熾熱既氣氛,我不停鼓勵弟弟學其他小朋友一樣打拍子甚至企起身歡呼。當然,佢一如既往:你想佢唔嘈果時佢就縱聲大叫,宜家想佢忘情狂歡佢就靜過太空。我諗要成為一個標準球迷都真係要時間訓練出黎。


比賽結束,最終主隊Calgary Wranglers以5比1大勝。現場球迷同我地一樣懷住滿足既心情離開。

我問弟弟第時仲想唔想再黎睇ice hockey,佢諗都唔駛諗就答我:想。

我都幾期待再有機會同佢去睇波。唔係因為我已經鐘意咗hockey呢個我仲要多啲時間認識既運動,而係我覺得沒有一項親子活動,比兩仔爺去睇波更具「男人的浪漫」。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!