[姐弟海外升學記] (四十五) 再談Work life balance

老細喺今日既team meeting宣布原定下星期一出街既project要delay到去星期三。有份做呢個project既同事B帶點為難地同老細講:「唔好意思,我個仔下星期三兩歲生日,原本想星期三放假不過我未同你講。因為諗住星期一個project就攪掂。」

同事B講完,老細都未黎得切反應,同事B即刻補多一句:「如果唔放得都ok既,我會make sure個project順利上線。」

其實個project我有份lead既,我自信我一個人睇都乜無問題。正想幫下口之際,老細卻喺呢個時候一面認真地開口:

「如果我一直無將呢樣野講得好清楚:唔好將你地既人生大事、生日、紀念日去遷就我地啲project既timeline。千祈唔好因為個project,改變咗你自己人生既計劃。」

我諗起吳浩康以前有一隻叫做「擇日失戀」既歌,歌既內容就係講因為做野要緊,連失戀都要遷就工作上既schedule。我諗呢隻歌就算譯咗做英文,啲加拿大人都唔會理解:Why「擇日失戀」?You should「擇日返工」instead right?

老細慢慢從認真既表情變成微笑:「Project永遠都會delay,好似今次咁。你就得佢幾多次?有同事cover到你就無問題了。」

老細話畢,我同另外一個同事即刻自動請纓幫同事B睇住啲野,叫佢即管放心同小朋友慶祝生日。

同事B如釋重負。我相信如果佢星期三放唔到假,就算應付到我地既老細,佢應該都不過了佢屋企既老細 (老婆)吧 。

之前我都講過,我覺得加拿大呢度唔係講work life “balance”。對大部分人黎講,life肯定係重要過work。當然……我諗呢種心態亦解釋到點解啲project成日要delay。

或者6月project第二階段launch既時候,我都應該叫老細俾我放下假。因為老細既一番話令我相信:紀念偉大既愛國詩人屈原,應該係重要過個project launch (note: 加拿大端午節係無假放既)。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!