最近執屋，竟然搵返當年阿囡讀幼稚園果陣我同佢溫習既認字卡。
記得阿囡k2、k3既時侯仲好溫馴 （即係一舊飯），對佢老豆我言聽計從。當時同佢溫習既任務，就落左係我身上。
不過有一樣野無論係佢幼稚園定宜家讀小學都一樣：同佢溫書，真係好悶。佢悶，我仲悶。
所以當時我就諗左一個idea：不如將佢要認既字變成字卡然後好似puzzle咁砌返？
自製卡通拼圖認字卡
個原理其實好簡單，首先將佢要認果d字開個Word或者Powerpoint打出黎 (我鐘意用Google Doc，你用Word都得)，每頁一個生字：
然後上網搵一張你阿囡阿仔鐘意既卡通wallpaper。阿囡細個果陣就梗係公主系列啦。
跟住就好睇你自己 / 公司部printer生唔生性了。我首先將個生字word file 1開16咁print做張圖（若你唔得，或者你可以一開始整個Word果陣就已經排好一張字寫16個字)：
然後我就揀呢張1開16既生字圖同埋張公主wallpaper，兩張圖雙面彩print出一張紙。Print完返去剪返開16張字咭就完成。
咁整完。。。真係點玩呢？
每次要溫習果陣就拎返d字咭出黎順返d次序排好：
跟住就同阿囡可以玩了！佢每答啱一個生字就可以反轉個字卡：
只要佢全部都識晒…佢要既公主wallpaper就會現身了！
呢個好玩在仲可以提佢：你成日唔記得果個字會令到個公主個頭或者手出唔到，下次佢就知要記熟邊幾個字。
自從我整左第一次之後，阿囡當年又真係次次考試都問我：有無字卡玩呀？又比晒idea我要咩公仔。
同阿囡懷緬左一輪啲字卡，然後互望一眼。或者大家可能都有同一個感受：「點解你宜家唔係好似當年咁有心機既？」