弟弟既同學好多都來自唔同國家，非常多元。佢既其中一位best friend係一個尼日利亞裔既小朋友。早排佢邀請弟弟去佢屋企玩，我地亦因此認識咗佢既媽媽 – 我叫佢做A媽媽。
A媽媽有一頭典型既黑人曲髮，長過肩既髮腳染咗兩種顏色。佢中等身高，體格結實，令我聯想起網球女將細威廉絲 (Serena Jameka Williams)。
點解要移民黎加拿大？
「喺我家鄉啲人工作時間好長，個個日日掛住做野。加拿大收重稅，你地越搵得多就俾人抽得越多，到最後，間接鼓勵大家唔好淨係掛住搵錢，咁大家咪多啲family time囉?」
我係第一次聽到有人用個咁正面既角度去理解加拿大既稅務政策。
Calgary原來並非A媽媽第一個移民目的地。佢一開始係先由尼日利亞移民去英國，住咗幾年後先輾轉搬黎加拿大。
「英國買野其實平過呢度，不過我覺得加拿大比較歡迎唔同族裔既人士，文化上比較多元啲，所以選擇搬黎呢度。」
加拿大雖然鼓勵多元文化，不過歧視、欺凌既問題並非唔存在。
「阿仔喺學校都有人同佢講啲唔好聽既説話。有一次有人喺校巴度取笑同推佢，佢即刻還手推返對方。」
事後，A媽媽要求佢個仔同另一個小朋友道歉。結果兩個人做返好朋友。
「大人好多時一遇到衝突會選擇避開或當無事發生，但問題其實無消失。 小朋友其實無隔夜仇，鼓勵佢地去積極面對，講出黎同道歉，未來既世界仇怨同歧視都會少啲。我覺得我地最緊要教小朋友既，係勇敢地speak up、分辦對與錯。」
「最唔好既係我地教小朋友講一套、做一套。我朋友個仔返學，隔離個小朋友同佢個仔講：媽咪叫我唔好坐喺黑人隔離，不過佢叫我唔好話俾人知呀！」
家長既態度，往往反映在小朋友身上。所以A媽媽覺得大人以身作則好重要。
「呢個經歷話俾我知：要好小心自己一言一行。因為小朋友看在眼裏聽在耳裏，講返出黎既時候唔會修飾。」
以為喺加拿大既父母都會放縱小朋友由得佢地？A媽媽管教小朋友一啲都唔馬虎。莫講話小朋友無手機無iPad玩，佢屋企連電視都無買。
「啲電子野真係好容易上癮，但大部分都無乜營養。有時間，我情願帶佢地一齊去圖書館睇書。」
難怪上次學校閱讀週，弟弟呢位朋友睇既書量喺全級之冠。
傾咗好耐，A媽媽話不如帶幾個小朋友去附近公園放電。一般家長去到公園都係坐埋一邊，點知佢反而自己捉住老婆同佢玩韆鞦，之後又拎咗羽毛球拍出黎同我地打。小朋友有小朋友玩之餘，佢自己都樂在其中。原來，佢自己可能先係最需要放電果個。
「做媽媽有陣時要放鬆下自己。有時教佢地教到好嬲，我會上樓上閂埋門，話俾佢地知我要冷靜一下。」
差不多要返屋企了，A媽媽忽然同我講：
「好多時一話同小朋友玩，爸爸自動會覺得係媽媽既責任唔關佢事，所以多數爸爸都唔會出現。多謝你今日出黎一齊玩。」
我有少少唔好意思。其實……我只係比佢地更想玩罷了。
臨別，A媽媽不停咁同我地影相：「我成日都唔記得影相。開心既時間應該要記住。你地都記住多啲同小朋友影相。」話畢，佢即刻幫我同弟弟兩父子影咗張相。果下我先發現，平時我同老婆成日掛住影佢兩姐弟，但其實我地好少同佢兩個合照。
好慶幸弟弟黎到加拿大可以結識到一個如此純真既朋友，更感恩遇到呢位熱情、率直又敢言既母親。喺呢位母親身上，學到以下幾樣野：
想小朋友睇多啲書？自己睇埋一份就可以了。
想小朋友玩得開心投入？自己都玩得投入就可以了。
想小朋友記住開心既時候？影多啲相，不過，記得將你自己加埋入張相入面。
無論有否移民：As a parent, make yourself present.
