[移民路上的人](二)愛道歉的貨車司機

今次名副其實係「路上」的人。

話說同老婆出去mall諗住買少少野,不過因為同弟弟班主任傾咗陣結果遲咗出門口。去到mall附近一條細路等出大路,忽然一股衝力從後將我同老婆從座位上推前。我同老婆都未黎得切驚,發現原來係後面架貨車(truck)撞到我地車尾。

一落車,貨車司機一臉抱歉咁走過黎詢問我地身體狀況。貨車司機係一個身材高大但略肥既白人,一身籃球裝束:黑色cap帽加一件舊NBA波衫,再配一對陳舊既白色波鞋。雖然滿面鬍鬚但難掩一臉稚氣,令我相信佢係不過廿五歲既年青人。我姑且叫佢做James。

由於意外輕微,我地一齊將車駛到去mall附近既停車場。我地一邊檢查車既情況,一邊詢問返James剛才既意外係如何發生。

「我頭先跟住你地車尾去到路口。我見到隔離線有架貨車好型好正,一分心以為你地已經開咗車,於是就踩油向前,結果撞到你地。係我大意所以先造成意外。」

雖然歌詞都有話:「果一條濕滑既公路,果個粗心大意既司機」。現實中,其實只需要有一個粗心大意既司機,就足夠令意外發生。

我一直以為交通意外多數都係雙方爭執然後報警先可解決。不過James由撞到我地到去到停車場一刻為止已經講左十幾次對唔住。而且全程佢都非常合作,我地問佢拎乜野文件 (e.g. driver license、insurance) 佢都快快手俾我地,仲錄咗段音俾我地確定係佢唔啱,要負全責。

撇除啲大道理唔講,我發現誠實至少可以令對方對你既恨意減少50%。

從James架truck既車牌得知原來佢係來自Manitoba (曼省,近年唔少香港人移民過去既加拿大省份),今次黎Calgary係出差。之所以會出現喺呢段路上,因為佢打算去個mall度買對新波鞋。睇住佢果對舊鞋,我信。

James:(興奮)「Calgary好正呀!我黎左2個星期左右,好鐘意呢度。呢度啲商場好大呀!我家鄉就無咁大既商場了。」

我未去過Manitoba,又唔知佢來自邊個城巿,所以都唔知佢講真定假。不過好老實,Calgary既商場比起香港既絕不算大(至少以佢打算去果個mall黎計)。如果James有機會去香港行海港城,相信佢會收返剛才既說話。

不過現實有時就係咁:喺你眼中係缺點既野,喺某人眼中,可能係優點都未定。

經過大約一個鐘左右,我地安排好保險事宜,我地同James終於可以講再見。

「真係好對唔住,我知道我破壞咗你地美好既一晚。不過…我真係好想講…對唔住。」

呢一次應該係佢第二十一次講既對唔住。如果呢件事要上庭, 我諗我可能會同法官大人講:「法官大人,被告既悔意係……..多得滯」。

James:「如果之後需要有任何跟進:保險、警察、任何事,請你地隨時搵我。我會盡全力配合。」

我:「明白了~希望你可以繼續好好享受Calgary。」

老婆:「係呀~ 同埋記得小心揸車呀!」

老婆事後同我講:如果我地唔係同班主任傾耐咗、如果我地唔係咁急去果個mall買野、又如果呢個年青人無過黎Calgary,呢個意外就不會發生。

通常我都會用「整定既」去wrap up呢件事。不過今次我比較樂觀:如果我地無黎Calgary就唔會遇上呢個小意外。不過如果我地無黎Calgary…可能你會因為弟弟既一份功課而想殺人呢…….

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!