[移民路上的人] (七) 酷似蘇有朋的地產經紀

喺外國買野果時,有無試過計返港紙,然後喺心入面同自己講「抵呀」或者「咁貴㗎」?

如果講緊係去旅行,咁買野平咗貴咗少少可能無傷大雅。但如果宜家係講緊移咗民買一間新屋呢?呢一招「計返港紙先」仲work唔work?


黎到加拿大兩個月左右,我地搵咗一位地產經紀帶我地去搵屋。經紀係亞洲人,第一次見佢就覺得佢好似有少少鬼仔味道既蘇有朋(台灣演員)。

我叫佢做Justin。

除咗酷似蘇有朋,Justin一身官仔骨骨既衣著加上佢果架無論幾時都洗得好乾淨既車,俾人一種一絲不苟既印象。

Justin根據我地俾佢既wishlist,大大話話帶我地睇咗幾十間屋。我同老婆由剛開始既十級興奮到睇到有少少「睇屋疲勞」,再慢慢開始有啲想妥協,求其揀一間就算。

但偏偏每一次Justin都好似忘記咗佢係有佣收咁,反過來勸我地再考慮下先。

我:「其實都夠住既,我地香港間屋細過呢間好多我地咪又係咁住。」

Justin:「但係小朋友會長大,而且喺加拿大你地擺喺屋企既野會多過喺香港好多。你慢慢就會發覺越來越唔夠地方用。」

我:「其實唔駛要相連既車房啦,間屋行過去個車房都係幾步。喺香港落停車場咪仲遠。」

Justin:「呢度既人去超巿通常會一次過買好多野;你要拎住咁多野重複來回間屋同車房會無咁方便。而且一到冬天,出面又凍、地下又滑,到時你會好辛苦。」

我:「其實條街都唔係好嘈啫,香港夜晚條街咪仲嘈。」

Justin:「就係因為呢度比香港少人少車,大部分時間都會好靜。所以如果你間屋近大馬路,一多車果時你就會忽然覺得好嘈。」

總之每一次我拎起我果副「香港人lens」去睇間屋,Justin都總係會好似見到我近視跌咗副眼鏡咁樣,即刻拎返副「加拿大人lens」俾我戴返再考慮。

我諗每一個移民既香港人,多多少少都會好似我咁戴住一副「香港人lens」去判斷加拿大或英國既事物。Justin不斷提醒我既,其實係最簡單既事實:「呢度唔係香港」。

用香港人既角度,永遠會覺得呢度啲屋又大又平,但唔會留意喺呢度住屋既需要,更未必意識到間屋係貴定係抵。同樣地,用香港人既角度去睇加拿大(或英國),你永遠都會覺得呢度人工低、買野貴又天氣凍,但忘記咗呢度既work life balance、樓價低同埋有暖氣。

或者移民要擺低喺香港既,除咗果一筆你想攞又攞唔到既MPF,仲有「香港做開果套」。不然,你只會永遠覺得新環境唔適合你。


喺我地入伙一週年,Justin無忘記我地,特登送咗一支酒俾我地慶祝。

我忽然有啲掛住Justin陪我地睇屋果時,佢時時刻刻對我「呢度唔係香港」既提醒。

因為我望住果支酒既一剎那,我竟然……諗緊佢計返港紙要幾錢……

(待續)

Leave a Reply

想睇到最新內容?

歡迎讚好「好校爸」Facebook專頁!