移民加拿大之後第一份工既上司係喺Calgary土生土長既加拿大人。我叫佢做Matt。
Matt一頭短曲金髮，戴住幼黑框眼鏡，下巴有少少鬚根，每次見佢都係著住件淨色Tee。有幾分似Matt Damon既佢，友善之餘俾人一種精明既感覺。
COVID前，公司派咗Matt去美國做野，佢從此就無再返過黎。難得佢呢個星期返黎Calgary幾日，我終於有機會同佢真人見面。
Matt選擇喺公司樓下一間咖啡店同我第一次面對面1 on 1，令交談既氣氛變得格外輕鬆。
一坐低，Matt首先問我喺公司工作年半以來既感想。
其實同Matt呢年幾既合作都幾愉快，因為Matt同我喺香港咁多位外籍上司一樣，都係採取「積極不干預」政策。
由於我長期work from home再加上Matt唔喺加拿大，一星期除咗兩個例會外，我幾乎係唔會同佢有任何交談。Matt每次交代咗要我做乜野之後就由得我自由發揮，從不會日日問你去咗邊、更不會催促或者俾我太多意見。
每次我同佢意見分歧，Matt基本上唔會太堅持。只要我既意見合理，佢總係鼓勵我挑戰佢既想法，堅持自己既意見，唔會行「我係老細我話事」呢一套。
西方人既「放手」文化，除咗用於育兒身上，原來同樣會用於職場上。
傾完工作，Matt開始關心我移民後既感受。
「黎咗加拿大年幾，宜家習慣嗎？」Matt一邊講，一邊愜意地欣賞佢杯Latte。
「我諗我算係開始習慣吧。」我答得有啲唔係好肯定。
「咁習慣咗呢度既冬天嗎？」Matt意味深長地笑了一下。
「你係咪打算每一次見到我都問我？」我帶笑回應。
當日同Matt interview既時候，Matt最後一條問題就係問我慣唔慣Calgary既冬天。當時黎咗Calgary只有三個月、仲未經歷過呢度嚴寒既我斬釘截鐵地話「無問題」，結果成為Matt久不久都會拎黎開我既玩笑。
「以前未去美國生活，每次有人同我講話Calgary凍，我都會同佢講：咪傻啦，Calgary邊度凍丫。有時覺得幾乎係一種辯護。」
「但去咗美國住之後，我一睇到Calgary零下幾十度，我會同自己講：never mind，Calgary真係好鬼凍。」
或者喺一個地方長大，好多野久而久之會變成習慣所以唔察覺；但離開以後，就開始會覺得不可思議。
正如以前喺香港，會覺得返工OT甚至做到通頂都係理所當然。但一離開咗香港，忽然覺得唔準時放工係不可思議。
每個地方都總有不可思議既事情。有時係天氣、有時係工作、有時係物價、有時係教育。
我諗移不移民，不過係選擇到底自己可以接受邊一種不可思議多啲罷了。
「多謝你特登返黎office同我見面，好開心終於可以面對面同你傾計。」Matt臨離開office同我握手道別。
對於呢一位我移民後第一個上司，我有一種特別既感激。
因為佢既讚賞同信任，令我能夠喺移民初段、一個全新既職場下消除不安，重拾對自己工作能力既信心。
（待續）
Planning to migrate to Calgary with my family, researching , and see your page
when I reading all your passages, make me smile~
just want to say HI and say ADD OIL!!!!!!!!!!!
Hi Regina! 多謝你睇我個blog同埋留言鼓勵！希望你過黎Calgary一切順利！Add oil!