喺Gordon間公司做咗十幾年，我由一個fresh grad慢慢變成有少少經驗既old seafood。
雖然公司俾咗我好多機會，不過生咗小朋友之後，開始想搵啲穩定少少既工作。於是我離開咗舊公司，加入一間跨國公司做in house員工。
新工既上司係美國人；公司喺美國調佢過黎香港，著手成立亞太區既新部門。同事因此幫佢改咗「美國隊長」（Captain America) 呢個花名。
我就叫佢做Steve吧。
Steve差不多六呎二、三高，雖然滿面鬚根又高大，但難掩佢既童心稚氣。佢其實真係有啲似《Avengers 3 Infinity War》入面果個留咗鬚既Captain America。
Steve雖然身為部門之首，不過十分親民，喺走廊撞到佢都會同你high five擊掌。有一次，同事趁Steve行開咗個位又無logout，偷偷地用佢部電腦send email俾成個部門話佢會請食野。Steve發現咗之後不但無嬲，第二日仲請哂我地全部人食早餐，然後笑笑口同我地講：「嗱，你地記住行開個位要logout呀。唔係下次就到你請㗎喇。」
因為Steve喺公司既形象非常討好，有時要同第二啲部門開會爭拗，只要叫埋佢，成個會既氣氛就會輕鬆好多。有同事因此形容佢係我地部門既「吉祥物」。
Steve係典型「易話圍」既老細。有時屋企有人上門整野又或者要接送一下小朋友，只要同佢講聲就可以work from home。
不過佢既「易話圍」，不單係平時日常工作上給予種種方便包容咁簡單。
有一次同Steve講起我同老婆有意帶小朋友返加拿大生活，佢竟然跟住走去問加拿大分公司果邊請唔請人，仲幫我約埋面試。
「雖然如果你成功咗，我就會無咗個好員工。不過我希望你會成功。」Steve同我講呢句說話既時候，我覺得佢好似啲老土電視劇中為咗女主角既將來忍痛割愛既男主角。
當時既我其實無心理準備要移民去加拿大，最後呢個relocation既機會亦因為加拿大分部重組而告吹。不過自此之後，我更確信我係遇到一個好好心地既老細。
我諗，我進入咗一個comfort zone。
一份好工再加埋Steve呢個絕種好老細，我當時覺得自己會喺呢間公司做到退休。
不過，入職3年後，喺我最舒服自在既時候，我選擇咗離開呢間公司。除咗憧憬下一站會比宜家更好，更大既原因係因為我開始感到不安。
我唔知道呢啲係咪所謂既中年危機，不過我開始幻想如果有一日呢個comfort zone消失：Steve唔撈、俾人炒咗又或者佢炒咗我，舒服開既我到時仲有無競爭力？我會唔會已經同外面既巿場脫哂節？
我預計唔到呢個comfort zone幾時會消失、甚至會唔會消失，不過我覺得如果唔趁自己有動力既時候離開，咁大概我以後都唔會願意離開。
因為comfort zone，一定只會越來越comfortable。
而我更害怕既係當有一日我真正想離開既時候，可能已經唔再係願唔願意既問題。更大既可能係我已經冇得選擇。
2020年，我決定咗移民之後，約咗Steve食飯。
Steve話屋企人不斷勸佢返去美國，但佢依然想留低。
「屋企人睇新聞話香港好危險，但其實呢度不知幾安全。喺美國，啲人會揸槍㗎。返美國咪仲危險？」Steve少有激動既語氣，令我覺得佢比我更唔捨得香港。
我諗起「有人辭官歸故里，有人漏夜趕科場」呢句老掉牙既說話。某程度上，香港已經由原本對Steve黎講一個陌生既地方變成佢既家、佢既comfort zone。
至少我知道，Steve成日都落樓下幫襯既果盒叉燒飯，已經成為佢其中一個不能離開既理由。
（待續）
