八月份既香港機場竟然如此冷清。我真正感受到COVID19呢個病毒，的確令世界停住了。
「故事何樣美，終極是分離」- 古巨基既《歡樂今宵》入面呢句歌詞，成為呢一刻既我、以及同我以相同理由黎到機場既人既寫照。
本來大家都係喺香港呢一個屋企開始自己既故事：喺至親既照料同長輩既教晦下成長、喺亦師亦友既前輩上司帶領下發展事業、邂逅畢生至愛然後一齊建立家庭……
試問我地當中，有幾多人會想到最終要同呢個屋企分離?
我係一個好怕離別既人，所以我叫所有親友唔好黎送機。細個果時我睇過一本叫做「牛仔」既漫畫，我記得自己睇完個主角去送機果一頁之後喊咗成晚。我唔希望自己喺哭聲之中離開呢個我成長既地方。
我地拎住一大堆行李去到航空公司櫃位checkin。如果呢一次只係去旅行，我地行李就稍嫌多咗少少；但如果呢一堆行李係我喺香港住咗幾十年既所有，又令我覺得少得可憐。
弟弟打趣地向每一件放落輸送帶既行李告別：「Bye bye！喺加拿大見！」，地勤姐姐望住天真既佢嫣然一笑，我卻無故鬱悶起來。
我諗我真係一個好怕離別既人。
畢竟要搭一程十幾個鐘既長途飛機，放下行李後，我地決定上機前先食少少野填飽個肚。
「應該去食港式茶餐廳吧？」我既感性話俾我知應該用臨別呢一餐好好懷緬一下香港美食，但我既理性又努力游說我：「喺機場食茶餐廳，好似唔係好抵」。
走著走著，我地最終喺機場既麥記坐低。呢個時候，麥記播起陳奕迅既《黃金時代》。
「黃金廣場內分手，在時代門外再聚」- 曲中主角與舊愛分離，儘管於一街之隔既舊地重遇，但人面已然全非。唔知他日我重踏香港既時候，香港呢個屋企會唔會都一樣變得陌生呢？
麥記魚柳包既味道，倒係率先變咗。我後悔無去食茶餐廳。
離開麥記，我地開始過關出境，我既心情亦開始緊張起黎。因為我好怕要坐成十幾個鐘飛機、好怕喺飛機上會感染COVID、更怕落機後將要面對一個陌生既世界。
儘管機場內失去昔日既熱鬧繁忙，但往登機閘口既路卻感覺比平時漫長。
以前黎到登機閘口，總係會指定動作式地同個航班指示牌合照，但今日卻提不起勁。因為以往出現喺呢個地點既時候，總係帶住一種憧憬，幻想旅程完結後，自己帶住開心回憶返黎呢個機場、返黎呢個屋企。
可惜今日既旅程，只係單程。
細個約咗人出旺角玩，對方問我喺邊，我望一望街名，傻氣地答咗佢一句：「我宜家喺彌敦道」。
對方有氣沒氣地回答：「阿先生，彌敦道係好長㗎」。
自此之後，彌敦道對我黎講，係一條無盡頭既路。
今日，我覺得自己好似終於行到彌敦道既盡頭 – 一條我無諗過會完既路既終點。
終點之後，係另一條路既起點。呢條陌生既路可能並不平坦、可能更迂迴曲折、更大可能係唔會有中文名。但無論如何，我相信我地一定不會孤單。
因為喺呢條移民路上，我地會帶住舊人既智慧同祝福去遇上新既人、開展新既故事。
登機既廣播響起，我一邊胡思亂想，一邊登上呢一班前往加拿大既航機。
如果呢一刻要揀一隻廣東歌作結，我諗我會揀一隻再舊少少既歌：林憶蓮既《不如重新開始》。
你呢？
（前傳完）
