[阿囡小一上學記] (二十八) 考完試做乜好呀?

經過終局之戰,終於都考完試啦!

又黎身份對調時間:以前一考完試呢段時間最開心,因為日日返學都係玩,又唔駛返足成日;但宜家做家長就覺得都幾煩,因為忽然間無野occupy佢地 – 大拿拿成個下晝唔通係屋企睇無線咩。

不過我估真係要呻,可能做老師既更加想呻。

咁辛苦教左一個學年,教晒啲小朋友再同佢地考埋試見住人人去玩果陣,又要好努力一邊改卷一邊攪啲試後活動出黎俾小朋友玩,感覺佢地仲做多野做過平時。

有乜試後活動?首先黎個STEM day。不過與其話係STEM day,倒不如話係試後嘉年華。見佢地有好多唔同既攤位遊戲,有畫面畫手、有釣玩具魚、有iPad遊戲、有手作仔等等。曹校長仲帶左個爆炸頭假髮同小朋友影相,心諗如果佢簡介會用返呢個造型可能仲多人黎報名。

之後有一個星期既大考debrief sessions。好好奇啲老師點debrief,特別係對FS1既小朋友,唔通講成個星期:「下次小心啲啦」?

然後,呢個星期輪到學校既project based learning week;問黎問去都唔知阿囡個project係咩,淨係知佢地要present,同埋有一日學校帶左佢地去機場童夢城。

去完返黎問佢玩成點:

囡:「都幾好玩,不過做太空人好無聊。」

我:「點解呢?」

囡:「份工就係扮去左太空,去到一個地方搵啲報紙扮殞石咁囉。數下啲殞石同數下人數就返地球了,都無野做既。」

再一次感受到以前果個cute cute小妹妹經過一年小學既脫變。以前既佢應該會話:「爸爸!今日我做太空人上左太空呀!原來太空係有石仔架!」

宜家既佢已經不再為果件都幾靚既太空制服所吸引。又或者,從來都只係我地啲家長被呢啲制服吸引吧。

不過,如果有份工叫做「公主」,可能又另計。

我:「咁仲做左啲咩工呀?」

囡:「我地有扮做手術囉。」

我:「咁你做醫生定病人呀?」

囡:(反眼)「梗係醫生啦。病人係職業黎架咩?下?下?」(開始識得勢不饒人)

心諗你無睇過國產凌凌柒你唔會明白:

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!