[阿囡小一上學記] (十七) 新年習作之模型車

漫長既新年假期來了，伴你成長既唔係「時興隆」，而係假期作業。阿囡既假期功課唔算多，但當中有一份令我一睇到就有少少頭痛。

呢份令我頭痛既功課其實係數學科既一張工作紙。之前阿囡係數學堂學左唔同既立體圖形(e.g. 錐體、柱體)，今次呢份功課就係要佢地用唔同既立體圖形整架模型車出黎：

一睇就覺得呢份功課好「親子」下 – 尤其是阿囡一向十分不擅長呢啲剪剪貼貼創作系列，今次仲係要整架車。咁即係話一定要家長 – 即係我，陪佢一齊做啦。

我其實都好怕呢類型既親子習作，成日覺得好難拿捏小朋友既參與程度。叫佢自己做對阿囡黎講真係好有難度；但到你出手又覺得其實真係我做多過佢做，認真矛盾。

另外，大部分呢類功課都鼓勵大家用環保物料，但好人好姐無人會儲廿幾個廁紙筒同四十幾支雪條棍係屋企嘛，結果有時要為環保而浪費。所以做左咁多次親子習作，最環保果次就係屋企細果個將家姐以前份功課「循環再用」，成份直接拎黎交功課。

再加上我本身手作能力認真麻麻，次次要我拎啲膠樽呀筷子呀咁去整舊野我都係不得要領。每次幾經辛苦整完開始有少少自信既時候，去到學校見到同學(既家長)果啲作品，就好想搵窿捐。

好，呻完。開工。

睇完工作紙個「brief」，物資部（老婆）好快手已經拎左屋企有既環保物資出黎。我同阿囡睇左陣，心入面大約有個想法，於是就畫左個好草既草圖。工程部（都係老婆）睇完都覺得okay，然後兩三下就七拼八湊砌左個初型出黎了。

一遇到呢類親子習作，我地通常都係將「整靚佢」呢一個重要既任務交俾阿囡。係阿囡好用心準備幫架車扮靚靚既材料既同時，我同老婆已經差唔多將模型車主要既部分準備就緒。最後我地將材料同埋佢既裝飾交俾阿囡好似砌模型咁合埋，模型車就大功告成。

雖則做之前呻左一輪，做完既製成品又同當初心目中所想相去甚遠，但親子習作最正面同最奧妙既地方，在於你同小朋友一齊合作做完之後，成件事好fullfiling。而你亦唔會好似平時一樣係度嫌佢份功課呢樣唔好果樣唔好，因為做得衰…你有份架嘛。

砌完之後未完架，工作紙上面仲有幾條問題俾小朋友思考下。

阿囡睇完呢幾個問題後滿腹疑問，睇黎我都係要出手俾多少少指引佢：

問題1：哪些因素使模型車能被人手推動？

答：幸運及天父的眷顧。

問題2：完成這個活動後，你學會了甚麼？

答：成功靠父幹。

問題3：活動中遇到那些困難或問題？你如何解決？

答：活動中遇到的主要困難是爸爸。我很快便叫了媽媽來，然後便解決了。