[加拿大升學] 加拿大學校種類 (Calgary)

加拿大亞省 (Alberta) 既學校種類*同香港既學校一樣大致分為公立、私立同埋特許公立(類似直資)學校。今次喺度講下呢幾種學校同香港既學校有乜相似同埋分別。

* 今次講既係Calgary既學校,因為加拿大每個省份都有唔同既制度,留意如果你想去溫哥華(BC省)或者多倫多(安省)個情況可能有少少唔同 (歡迎有經驗既分享下)。

學制

未講有乜學校之前,先講咗呢度既學制先。喺Calgary讀preschool同香港一樣唔係必需;讀幼稚園都只係讀一年,唔係好似香港咁讀3年。

呢度既學校主要分為小學 (幼稚園 + grade 1 – 6)、初中 (middle school,grade 7 – 9) 同埋高中 (high school,grade 10 – 12)。公立學校通常唔會由k讀到grade 12(同香港官津一樣無所謂既一條龍),所以小朋友通常會讀3間學校;如果係私校或者所謂既特許公立(類似直資)就會有機會一間讀唒。

公立學校 (Public School)

公立學校其實同香港既官津好似;喺香港既官津校網入面我地有好多學校可以揀,先有自行派位 (計分制,例如兄弟姐妹或教會分) ,派唔到就再大抽奬(跟喜好同埋住址填幾十間學校然後等抽簽),再唔啱就大抽奬之後去叩門(面試)。

Calgary既學校派位主要係跟據你既地址,每個地址都會有一間所謂既designated school。你既designated school一定要收你,除非滿咗學位佢就會派你去第2區讀。

好似香港既自行派位同埋大抽奬既甲部咁,你係可以不受地區限制揀任何一間學校報名;不過因為designated school既學生係必收,如果學校太多人報,佢地都會好似香港咁抽簽,但會以所謂既walkzone (即係圍繞間學校可步行距離既範圍) 同埋有無兄弟姐妹為首要考慮:

如果你想睇下你既designated school係邊間,你可以去教育局(CBE)既網站度用佢既School Finder。你可以直接入你個地址(圖註1) 又或者揀你住既community(圖註2),佢就列出你既designated school(圖註3):

除咗傳統學校會提供既regular program,部分學校會offer所謂既alternative program。Alternative program係另一種教學模式,例如用唔同語言教學、或者大家成日聽到既蒙特梭利 (Montessori)。有alternative program既學校相對少,要入的話都係跟據地址、兄弟姐妹同埋抽簽。

私立學校 (Private School)

私立學校都同香港既私校一樣,基本上…俾錢囉。

咁同香港比較的話,學費貴唔貴呢?

呢度既私校既價錢都好參差,由幾百蚊到萬零二萬蚊加紙都有,即係大約2千蚊至十幾萬港紙一年左右吧。不過留意呢邊稅重,人工可能亦未必同香港一樣。

想睇下有乜學校同埋大約幾錢學費可以睇下以下websites:

特許公立學校 (Charter School)

特許公立學校就有啲似香港既直資學校。佢地都係public school,不過係由非牟利機構經營,而且比public school攞少啲既funding。同香港有少少唔同既係charter school係唔會有宗教背景,亦唔可以收學費(不過學校會有雜費例如校車、課堂要用既材料費等等)。

每間Charter School都有一個主題,為唔同類型既學生設計啱佢地既課程,例如有啲係專收資優學生既 (e.g. Westmount Charter School),有啲專攻理科既 (e.g. Connect Charter School)。

入學條件同香港既直資一樣都係由學校決定,同埋亦一樣係好多人報。例如我聽過FFCA係基本上你一出世就要開始報名排隊,分分鐘都未必排到……

如果想了解多啲咩係Charter School可以睇呢條片:

教會學校

呢度既教會學校係直頭行另一個system,由另一個叫做Calgary Catholic School District (CCSD)既board執行。不過同公立學校個system好似,都係跟你既住所黎派學校。

若你想小朋友入讀有宗教背景既學校,可能就要去呢類學校度報名。可以參考以下website: https://www.cssd.ab.ca/Pages/default.aspx

下回會再講下呢度既學校係點申請入學,同埋有啲乜野唔同課程可以選擇。

10 Comments

    • 唔好意思我都唔知,因為我無宗教信仰亦未識人讀呢類學校。知道既再update!

  1. 請問報讀高中,要點做?有甚麼考慮?要考試嗎?
    可分享教會學校怎樣報讀嗎?

    • Ben你好,好抱歉我個小朋友仲細,所以都唔清楚報高中既細節;教會學校要去另一個board度登記:https://www.cssd.ab.ca/,你可以去個site度睇下。

      唔好意思無乜資料幫到你~

  2. 你好, 想請問下係Calgary, 小朋友係五歲開始讀幼稚園, 讀一年就讀小學嗎?
    咁五歲前小朋友係屋企咩都唔學? 出去讀pre school個啲係咪好貴

    • Sarah你好!Yes, 讀一年幼稚園就升小學,宜家我估多咗華人喺度所以其實都有preschool,不過我唔知價,因為小朋友唔駛上。我細仔K3過黎。

  3. 如果小朋友小學3年級過去,冇加拿大passport,有熟朋友可以做監護人,在Calgary 是否有私立寄宿學校選擇?謝謝

  4. 因為先生relocation,我地會由WINNIPEG搬黎CALGARY, 仔仔2024年9月讀K, 想問算唔算易搵BEFORE AND AFTER DAYCARE?

    • 你好!唔好意思我都唔清楚,因為本身唔係用家。我諗亦好depends你住喺邊區?

發佈回覆給「好校爸」的留言Cancel Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!